Ճգնաժամը Հայաստանում խորանում է, որի էությունն այն է, որ ոչ միայն պատերազմի պատճառները չեն բացահայտված, այլ նաեւ այդ պարտության հետեւանքները, որոնք մեզ սպասվում են, չեն վերացված: Այս մասին, այսօր՝ օգոստոսի 6-ին, ԱԺ-ում հայտարարեց «Հայաստան» խմբակցության պատգամավոր Արմեն Ռուստամյանը:
«Դրա դեմ առնելու խնդիրն է, որ այս ԱԺ-ն պարտավոր է լուծել: Մենք չենք թողնելու, որ այստեղ ծածկադմփոց տեղի ունենա: Հստակ ցույց ենք տալու, թե ինչ խնդիր գոյություն ունի, որ դուք պարտավոր եք այստեղ բերել լուծել եւ հանրությունն իմանա, թե ինչ մոդելով եք տեսնում դրանց լուծումը: Արցախի հարցը այստեղ առանցքային հարցերից մեկն է: Մենք ասում ենք, պարտության հետեւանքները չեզոքացնենք եւ դրանից բխող գործիքակազմ ստեղծենք, քայլեր կատարենք»,-ասաց նա:
Արմեն Ռուստամյանի խոսքով, քանի որ Արցախի հարցով հանձնաժողով ստեղծելուն դեմ արտահայտվող իշխող ուժը փաստարկների առումով կաղում է, դա ողջամիտ կասկածներ է առաջացնում, որ իրենք չեն ուզում Արցախի հարցով միջազգային հանրությանը հայտարարեն հստակ դիրքորոշում, եւ դա այն դեպքում, երբ Ալիեւը անընդհատ հայտարարում է, որ Արցախի հարցը կարգավորված է, ոոր ընդհանրապես «Լեռնային Ղարաբաղ» բառակապակցությունը չպետք է օգտագործել:
«Իսկ մեր փաստարկները հստակ են. դրանք միտված են պարտության հետեւանքների չեզոքացմանը, ճգնաժամի հաղթահարմանը: Դուք ասում եք, չկա ճգնաժամ, ինչը հաղթահարենք:
Նախ, պետք է վերականգնել Հայաստանի՝ որպես Արցախի անվտանգության երաշխավորի խարխլված դիրքերը: Վերականգնել Արցախի խարխլված սուբյեկտայնությունը, վերականգնել Հայաստան-Արցախ հրաբերությունների ռազմավարական մակարդակը: Ստեղծված նոր իրավիճակում հայկական կողմերի հայեցակարգը պետք է հստակեցվի: Էս բաները որտե՞ղ է ճշտվելու, թե՞ թողնելու եք, որ էլի կուլիսներում ճշտվի, հետո պարզվի, որ ոչ մի բան էլ չի ճշտվում, ինչ ուզում, անում ենք: Չենք թողնելու ինչ ուզեք, էդ անեք:
Էլ չեմ ասում, որ միջազգային ճանաչման նոր գործընթաց է պետք խրախուսել: ՌԴ խաղաղապահի առաքելության ռեժիմի հետ կապված հսկայական հարցեր կան, որ պետք է քննարկել»,-ասաց Արմեն Ռուստամյանը:
Նա վստահություն հայտնեց, որ եթե վերջնականապես կորցնենք Արցախի հարցիր հայանպաստ կարգավորումը, Հայաստանը կորելու է. «Մենք երեք բանով էինք աշխարհին հետաքրքրում. Արցախի հարց, Սյունիք եւ ատոմակայան: Հիմա մեկը կորցնում ենք, մյուսը կորցնելու վտանգի տակ ենք, եւ մեր հաղթաթղթերը սպառվում են»:
News.am
