Արևմտյան Եվրոպայի Հայ Եկեղեցու հայրապետական պատվիրակ, Գերաշնորհ Տեր Խաժակ Սրբազանը շնորհավորագիր է հղել Վեհափառ Հայրապետին՝ գահակալության 26-րդ տարեդարձի առիթով.
«Նորին Սուրբ Օծութիւն
Տէր Տէր Գարեգին Բ.
Ծայրագոյն Պատրիարք եւ Կաթողիկոս Ամենայն Հայոց
Վեհափառ Տէր,
Արեւմտեան Եւրոպայի Հայրապետական Պատուիրակութեան հոգեւորականներու, Եկեղեցական խորհուրդներու, հաւատացեալ մեր ծխականներու եւ իմ կողմէ կուզեմ շնորհաւորել Ձերդ Սրբութեան գահակալութեան 26-րդ տարեդարձը։
Հայ Եկեղեցւոյ ու Հայրենիքի առջեւ ծառացած մարտահրաւէրներով լեցուն այս ժամանակաշրջանին խորապէս երախտապարտ ենք տեսնելով Ձեր անսասան հաւատքը եւ անսակարկ նուիրումը։ Իբրեւ քաջ հովուապետ Դուք հետեւեցիք մեր Տիրոջ օրինակին. «Ես եմ հովիւն քաջ. հովիւ քաջ զանձն իւր դնէ ի վերայ ոչխարաց»:
Վեհափառ Տէր, քաջութեամբ ու քրիստոնէական սիրով՝ Դուք շարունակեցիք հետեւիլ մեր Տիրոջ կանչին իբրեւ Հայրապետ Ամենայն Հայոց։ Անցնող 26 տարիներու Ձերդ Սրբութեան հովուապետական առաքելութիւնը մեզ կը յիշեցնէ Մատթէոս Աւետարանի մէջ արձանագրուած Քրիստոսի հետեւեալ խօսքերը «Եթէ մէկը կ՛ուզէ իմ ետեւէս գալ, թող ինքզինք ուրանայ, խաչը վերցնէ եւ իմ ետեւէս գայ»: Տարիներ շարունակ այս վկայութեամբ, Ձեր Սրբութիւնը եղաք ո՛չ միայն հովիւ հոտին, այլ նաեւ անխոնջ մշակ՝ հայոց հաւատքի ու Եկեղեցւոյն, Հայոց յաւիտենական արժէքներու։
Մարտահրաւէրներու ու դժուարութիւններու դէմ, Ձեր քաջութիւնը եւ հայրական հոգատարութիւնը եղան լոյսի եւ յոյսի օրինակ մեր ազգի համար։ Ձեր խաչակրութիւնը՝ սիրով ու հաւատքով լի, վկայութիւն մըն է անհուն սիրոյ՝ Հայ Եկեղեցւոյ եւ մեր հայրենիքի հանդէպ։
Վեհափառ Տէր, թող Տէրը պարգեւէ Ձեզ առողջութիւն, երկնային իմաստութիւն եւ համբերութիւն, որպէսզի շարունակէք Ձեր առաքելութիւնը ի բարօրութիւն Հայ Եկեղեցւոյ եւ մեր ազգին։
Կը մատչիմ ի համբոյր Ձերդ Սրբութեան Ս. Աջոյն,
Խոնահաբար, Խաժակ Արքեպս. Պարսամեան»:
