ՀՀ էկոնոմիկայի նախարար Գևորգ Պապոյանը վստահ է՝ Նիկոլ Փաշինյանը երբեք չի խախտել որևէ մեկի անմեղության կանխավարկածը։
Նախարարը նման տեսակետ հայտնեց, երբ լրագրողները հետաքրքրվեցին՝ ի՞նչ գնահատական կտա գործադիրի ղեկավարի՝ երեկ ԱԺ-ում հնչեցրած սպառնալիքներին։
Դիտարկմանը, որ ՀՀ շատ քաղաքացիներ ասում են՝ գործող իշխանություններն օր առաջ պետք է հեռանան, Պապոյանն արձագանքեց՝ Հայաստանում ժողովրդավարություն է, և ՀՀ քաղաքացին կարող է ազատորեն արտահայտել իր կարծիքը։
Ի պատասխան հարցի՝ Նիկոլ Փաշինյանն ազատ խոսքի սկզբունքից ելնելո՞վ է ընդդիմադիրներին «համբալ» անվանում, կամ Փաշինյանն իրեն երբևէ «համբալ» ասած կա՞, Գևորգ Պապոյանը կոռեկտության կոչ արեց լրագրողին՝ նշելով, որ չի պատասխանելու նրա հարցերին։
«Հանրապետության վարչապետի պահվածքը շատ ադեկվատ էր այդ իրավիճակին, ավել մեկնաբանություններ չունեմ։ Հեղափոխական գաղափարի շրջանակում է, որ ժողովրդի կողմից գողության մեջ ամեն մի մեղադրվող չկարողանա ժողովրդի իշխանությանն ասել այն, ինչ մտքով անցնում է։ Եթե ասում էլ է, պիտի դրա պատասխանն ստանա»,- ասաց Պապոյանը։
