Պատերազմից հետո առնվազն 6 ամիս Սփյուռքում դա տաք թեմաներից մեկն էր: Լրագրողների հետ զրույցի ժամանակ այս մասին ասաց Սփյուռքի հարցերով գլխավոր հանձնակատար Զարեհ Սինանյանը՝ անդրադառնալով պատերազմի ժամանակ սփյուռքահայերի կողմից հիմնադրամին ուղղված ֆինանսական աջակցություններին:
«Գումարը հավաքվել էր կոնկրետ մի նպատակի համար և համարժեք գումար իրոք ծախսվել է պատերազմի համար: Հետևաբար այդ հարցն ի սկզբանե կեղծ թեմա եմ համարել: Այլ հարց է, որ ունենք լուրջ անվստահության մթնոլորտ Հայաստանի ու Սփյուռքի միջև: Երկար տարիներ ԱՄՆ-ում ապրելով՝ կարող եմ հավաստիացնել, որ այն գումարները, որոնք հանգանակվել են և հետագայում տարբեր կառույցների միջոցով փոխանցվել Հայաստան, չեն ներկայացնում Սփյուռքի ներուժի նույնիսկ ամենաչնչին տոկոսը»,-ասաց Զարեհ Սինանյանը:
Վերջինս նշեց՝ պետք է դուրս գանք Սփյուռքի կարողությունները դրամական օգնությամբ չափելու ֆորմատից, ինչը Զարեհ Սինանյանի կարծիքով բարդույթ է և խանգարում է Սփյուռքի հետ հարաբերություններում:
«Սփյուռքը շատ ավելին ունի տալու Հայաստանին, քան այդ դրամական միջոցները: Երբ կստեղծվեն հարգալից, երկկողմանի ընդունելի հարաբերություններ, այդ ժամանակ կտեսնենք Սփյուռքի իրական պոտենցիալի ներգրավվածությունը Հայաստանի կյանքի բոլոր բնագավառներում»,-նշեց Զարեհ Սինանյանը:
Աղբյուր` Փաստինֆո
