Ադրբեջանի նախագահ Ալիևը հայտարարել է, որ օկուպացված Արցախի մայրաքաղաքի կենտրոնական հրապարակը նոր անուն ունի՝ «Հաղթանակի հրապարակ»։
Ստեփանակերտի «Վերածննդի» հրապարակում նովրուզի կրակը վառելիս է նա իր որոշման մասին հայտնել՝ Հայաստանի ու հայերի հասցեին սպառնալիքներ հնչեցնելով, թե արցախյան երկրորդ պատերազմը հայերին դաս չեղավ։
Ալիևը մենախոսել է անմարդաբնակ Ստեփանակերտի հրապարակում, որովհետև նրան լսողներ ներկա չեն եղել։
Մենախոսության մեջ նա ասել է. «Մենք ցույց ենք տվել մեր ուժը, և այսուհետ բոլորը պետք է մեզ հետ հաշվի նստեն, այլապես իրենք կզղջան»։
Ի դեպ, ինչպիսի՜ զուգադիպություն. նովրուզի կրակը վառելու օրը Փաշինյանն էլ Տավուշ է գնացել՝ ասելու, որ եթե 4 գյուղերը Ադրբեջանին չտաք, պատերազմ կլինի։
Ալիևը օկուպացված Ստեփանակերտի հրապարակից հոխորտացել է, թե հայերը դաս չեն քաղել պատերազմից, իսկ Փաշինյանը նույն ժամանակահատվածում տավուշցիներին ասել է՝ գյուղերը չտաք, պատերազմով կվերցնեն։
Ինչ խոսք, երկուսով սինքրոն աշխատում են «դու ուզիր, ես տամ, ինչքան ուզես, այդքան կտամ» ծրագրով։
