Ռուսաստանի նախագահ Վլադիմիր Պուտինը Դաշնային ժողովին ուղղված ուղերձում հայտարարել է, որ անցյալ դարի 30-ական թվականներին Գերմանիայում նացիստների համար Արևմուտքը գործնականում բացեց իշխանության ճանապարհը, իսկ մեր ժամանակներում նրանք «հակառուսաստան» են ստեղծել Ուկրաինայում։
«Արևմուտքն օգտագործում է Ուկրաինան՝ որպես Ռուսաստանի դեմ հավաքական հարված։
ԱՄՆ-ը թաքնվում է ժողովրդավարության և ազատության մասին հայտարարությունների հետևում՝ շեղելով ներքին աճող խնդիրներից։ Աշխարհի ոչ մի երկիր դրսում չունի այդքան ռազմաբազաներ, որքան ԱՄՆ-ն։ Դրանք հարյուրներով են, ամբողջ մոլորակը լցված է դրանցով։
ԱՄՆ-ի կողմից 2001 թվականից սանձազերծած պատերազմների հետևանքով զոհվել է գրեթե 900 հազար մարդ, ավելի քան 38 միլիոնը դարձել է փախստական։
Ռուսաստանը բաց էր անվտանգության հարցերով Արեւմուտքի հետ երկխոսության համար, սակայն դրա դիմաց ստացավ կեղծավոր արձագանք եւ ՆԱՏՕ-ի ուժերիընդլայնում»,- ասել է Պուտինը։
Իր ելույթում ՌԴ նախագահը շեշտել է, որ մարտի դաշտում Ռուսաստանին հաղթելն անհնար է, հետևաբար ավելի ու ավելի ագրեսիվ տեղեկատվական հարձակումներ են իրականացվում: «Նրանք անընդհատ ստում են, չեն դադարեցնում հարձակումները մեր մշակույթի, ռուս ուղղափառ եկեղեցու վրա։
«Հակառուսաստան» նախագիծը Արևմուտքի ռևանշիստական քաղաքականության մի մասն է. գաղափարը մեկն է՝ Եվրոպայում պատերազմ հրահրել ուրիշի ձեռքերով… Մենք Ուկրաինայի ժողովրդի հետ պատերազմի մեջ չենք, նրանք իրենք են դարձել Կիևի ռեժիմի պատանդը»,- նշել է Պուտինը։
Անդրադառնալով համաշխարհային մակարդակում նորագույն զինատեսակներով զինվելու իրողությանը՝ նա շեշտել է, որ Ռուսաստանն ակտիվորեն ներդնելու է տեխնոլոգիաներ, որոնք բարձրացնում են բանակի և ռազմածովային ուժերի մարտունակությունը։
