Գիտությունն ինձ համար և մեր կառավարության համար առանձին վերցրած ոլորտ չէ, և հազար ներողություն՝ գիտության զարգացումն, ինքնին առանձին վերցրած, իմաստ էլ չունի։ Այսինքն՝ գիտությունը զարգանա՝ որ ի՞նչ. որովհետև գիտության զարգացումը մեզ համար պետության զարգացումն է, Գիտությունների ազգային ակադեմիայում այսօր ունեցած ելույթում հայտարարեց ՀՀ վարչապետ Նիկոլ Փաշինյանը։
«Մենք այսօր հուշարձանների վերականգնման, պեղումների վրա ահռելի միջոցներ ենք ծախսում, և գիտության ոլորտի ֆինանսավորման ավելացումները մի տողով վերաբերվում են նաև հնէաբանությանը, հուշարձամնների պահպանությանը։ Սա շատ կարևոր է մեր ինքնության համար, մեր ինքնությունը ոչ միայն պահպանելու, այլև զարգացնելու՝ ինքներս մեզ ավելի լավ ճանաչելու տրամաբանությամբ։
Վերադառնալով տնտեսությանը՝ ակնհայտ է, որ ամեն մի պատմամշակութային հուշարձանի վրա ներդրումը զբոսաշրջիկների հոսքեր է ավելացնում դեպի ՀՀ։ Սա իր հերթին ավելացնում է պետական եկամուտները, ինչն էլ հնարավորութուն է տալիս ավելի մեծ ֆինանսավորում ուղղել դեպի գիտություն։ Սա մի շրջանաձև պրոցես է»,- ասաց Նիկոլ Փաշինյանը։
Նա միաժամանակ անդրադարձավ արհեստական բանականության՝ գիտության ոլորտում կիրառության հարցին՝ հիշեցնելով, որ ԵՊՀ-ում կառավարության ֆինանսավորմամբ արդեն իսկ գործարկվել է մեկ սուպերհամակարգիչ։
«Սակայն չունենք մոդուլ, թե օրինակ 40 միլիարդի ներդրումը գիտության ոլորտում ինչքան աճ է բերել տնտեսությանը»,- ասաց Փաշինյանը։
