«Հայաստան» խմբակցության պատգամավորները Երևանում իրազեկման ակցիա են իրականացնում՝ ապրիլի 5-ին նախատեսված հանրահավաքին ընդառաջ:
Հիշեցնենք, որ Նիկոլ Փաշինյանը կառավարության նիստում հայտարարել էր, որ «Խաղաղության պայմանագիրը» մտադիր է քննարկել Ալիեւի հետ՝ ապրիլի 6-ին Բրյուսելում՝ ԵՄ-ի հովանու ներքո, նախատեսված եռակողմ հանդիպման ընթացքում: Ինչից հետո ընդդիմությունը հանդես եկավ հանրահավաք կազմակերպելու նախաձեռնությամբ, քանի որ առկա են բոլոր հիմքերը կարծելու, որ նոր փաստաթուղթը, ինչը գաղտնի է պահվում հայ հասարակությունից, չի բխում հայության շահերից։
Պատգամավոր Վահե Հակոբյանը լրագրողների հետ զրույցում նկատեց, որ այն, ինչի մասին ասում են մոտ 4 տարի, արդեն մոտենում է իր գագաթնակետին, շուտով կկորցնենք Արցախը, Հայաստանը, պետականությունը, հիմնը, զինանշանը: Ըստ նրա՝ ցանկանում են տագնապ բարձրացնել, որ հանրությունը գիտակցի, որ արդեն կորցնում ենք Արցախը, իսկ առանց Արցախ՝ գոյություն չունի Հայաստանը:
Ընդդիմադիր գործչի գնահատմամբ՝ Փաշինյանը հանդիպմանը՝ համաձայն որդեգրված քաղաքականությանը, Բրյուսելից կվերադառնա՝ ևս մեկ անգամ ժողովրդի թիկունքում փաստաթուղթ ստորագրած:
