Հոկտեմբերի 20-26-ը Երևանում անիմացիոն տոն է․ վերադառնում է «ՌեԱ» անիմացիոն ֆիլմերի և պատկերապատման արվեստի միջազգային փառատոնը՝ էլ ավելի հագեցած ծրագրով, հետաքրքիր շնորհանդեսներով, հայկական և միջազգային արտադրության կարճամետրաժ և լիամետրաժ ֆիլմաշարով, միջազգային հյուրերով, աշխատարաններով, վարպետության դասերով և ամենակարևորը՝ երիտասարդ ստեղծագործողների, անիմատորների համար նոր հնարավորություններով։
«ՌեԱ» փառատոնը ստեղծվել է 16 տարի առաջ՝ քաղաքական երգիծանկարիչ, նկարիչ և անիմատոր Քասունու կողմից։ Այն կազմված է 3 կարևորագույն բաղադրիչներից՝ ցուցադրվող ֆիլմերը, MarAni անիմացիոն շուկան և Rea Comics Art-ը։
Ավելի քան 300 ֆիլմ՝ 45 երկրներից․ այս տարի ֆիլմաշարը համալրում են նաև Կաննի, Անսիի, Սան Սեբաստիանի և Բեռլինի կինոփառատոներում ցուցադրված 7 մրցութային լիամետրաժ, ինչպես նաև հայկական արտադրության կարճամետրաժ անիմացիոն ֆիլմեր։ Հայ հանդիսատեսը նաև բացառիկ հնարավորություն կունենա վայելելու Դիսնեյի անզուգական աշխարհը։ Առաջին անգամ Երևանում՝ Կինոյի տան մեծ էկրանին, կցուցադրվեն «Փարիզի Աստվածամոր տաճարի կուզիկը», «Ատլանտիս․ կորսված կայսրությունը» և «Գեղեցկուհին և հրեշը» լեգենդար ֆիլմերը։
Փառատոնի երկրորդ բաղադրիչը՝ MarAni անիմացիոն շուկան, այս տարի կանցկացվի հոկտեմբերի 21-24-ը ՀԲԸՄ-ում։ Հարթակը կյուրընկալի միջազգային հյուրերի՝ Ֆրանսիայից և եվրոպական այլ երկրներից, ովքեր աշխատարանների և դասընթացների ընթացքում կխոսեն անիմացիայում AI, VR և այլ ժամանակակից տեխնոլոգիաների կիրառումից, կկիսվեն իրենց մասնագիտական կարևոր գաղտնիքներով ու գիտելիքներով։
Հայաստան կժամանեն նաև ներկայացուցիչներ Դիսնեյից․ փառատոնի շրջանակում միջազգային ճանաչում ունեցող անիմատոր, ռեժիսոր և սցենարիստ Քըրք Ուայզը, ինչպես նաև ռեժիսոր Աարոն Բլեյզը կկիսվեն իրենց գիտելիքներով։ Քըրք Ուայզը կմասնակցի փառատոնի հատուկ միջոցառումներին և կխոսի իր մասնագիտական ուղու, անիմացիայի ոլորտում ունեցած փորձի և նորարարական մոտեցումների մասին։ «ՌեԱ» փառատոնը կյուրընկալի նաև պրոդյուսեր Մաքս Հոուարդին՝ ԱՄՆ-ից, անիմատոր և ռեժիսոր Կիմ Կյոկելեյրեին՝ Բելգիայից, մուլտիպլիկատոր և կինոռեժիսոր Օրելին՝ Ֆրանսիայից, ռեժիսոր Ժորժ Շվիցգեբելին՝ Շվեյցարիայից, ռեժիսոր, NEXT Lab Generation-ի ղեկավար Խոսե Լուիս Ֆարիասին՝ Իսպանիայից, VR արվեստագետ, ռեժիսոր և խաղերի դիզայներ Դեն Ֆրենկին՝ Գերմանիայից և մեծ համբավ ունեցող մի շարք այլ մասնագետների։
MarAni անիմացիոն շուկան ներառում է նաև CoReAct համարտադրության հարթակը, որն առաջին անգամ ներկայացվել էր անցյալ տարի։ CoReAct-ը հարթակ է այն երիտասարդների համար, ովքեր իրենց նախագծերն ու գաղափարները ներկայացնում են միջազգային պրոդյուսերներին՝ հնարավորություն ստանալով համարտադրել իրենց անիմացիոն ֆիլմերը։
Այս տարի 17 նախագծեր կներկայացվեն շուրջ 13 արտասահմանյան մասնագետների, պրոդյուսերների` առաջատար ընկերություններից, ինչպիսիք են Եվրիմաժը, Cartoon media-ն, «Անսի» միջազգային կինոփառատոնի անիմացիոն շուկան, France TV-ն և այլն։
«ՌեԱ»-ի շրջանակում հոկտեմբերի 23-ին Նկարիչների միությունում տեղի կունենան նաև ReA Comics Art ցուցադրությունները: Փառատոնի շրջանակում թարգմանվել են երկու կոմիքս գրքեր՝ «Միսաք, Մելինե և խումբ Մանուշյաններ» և «Բռնցքամարտիկը», որոնց շնորհանդեսը ևս տեղի կունենա ReA Comics Art-ի շրջանակում։ Այդ օրը տեղի կունենա նաև «Սասունցի Դավիթ» կոմիքս գրքի ցուցադրությունը․ այն նախորդ տարվա հաղթող նախագծերից է։
Ինչպես նախորդ տարի, այս տարի ևս կոմիքսների մրցույթի ժյուրիի կազմում ներգրավված են միջազգային մասնագետներ։
