«Տեղյակ չեմ, հիմնապատճառը չգիտեմ, որոշումը կայացվել է ԱԱԾ-ի առաջարկով, նրանց էլ հարցրեք»,- այսպես է հուլիսի 21-ին Մուրադ Փափազյանի՝ Հայաստան մուտքի արգելքին առչվող հարցին արձագանքել Սփյուռքի գործերի գլխավոր հանձնակատար Զարեհ Սինանյանը:
ԱԱԾ-ից` ոչ, բայց ընդամենը մեկ օր անց հենց կառավարությունից էլ հնչեց պարզաբանումը. ՀՅԴ բյուրոյի անդամ եւ Ֆրանսիայի հայկական ընկերությունները համակարգող խորհրդի նախագահ Մուրադ Փափազյանը չի կարող գալ հայրենիք, որովհետեւ նա «2021-ի հունիսի 1-ին Ֆրանսիայում ՀՀ դեսպանության մոտ վարչապետի ավտոշարասյան դեմ հարձակում կազմակերպած անձանցից մեկն է»:
«Ավտոշարասյան ուղղությամբ նետվել են տարբեր իրեր, առարկաներ: Վարչապետի ՀՀ պետական դրոշակիր ավտոմեքենան ենթարկվել է հարձակման, և ստեղծված իրավիճակը հաղթահարվել է միայն ֆրանսիական ոստիկանության և անվտանգության ուժերի ջանքերի արդյունքում»,- ասվում է «Արմենպրեսին» ներկայացված պարզաբանման մեջ:
Մինչեւ այս, ԱԱԾ-ն որեէ կերպ չէր ներկայացնում պատճառը, թե ինչու Փափազյանը չի կարող գալ Հայաստան՝ հղում կատարելով «Տեղեկատվության ազատության մասին» օրենքի այն հոդվածին, որն առնչվում է մարդու անձնական եւ ընտանեկան կյանքի գաղտնիությանը:
Փափազյանը Հայաստանի համար հայտարարվեց անցանկալի անձ: Նման անձանց բանկը մեր երկրում, ըստ օրենքի, պետք է վարի ԱԱԾ-ն: Բայց սա «ժողովրդավարության բաստիոնն է», եւ այստեղ որոշումները կայացվում են միանձնյա:
Այն, որ Փափազյանի հանդեպ որոշումը կայացվել է Փաշինյանի անմիջական հրահանգով, իր ֆեսբուքյան էջում մոտ տասն օր առաջ հենց Փափազյանն էլ գրել էր:
Ի դեպ, այս արգելքը կիրառվում է նաեւ ակցիայի մյուս մասնակիցների հանդեպ:
2021 թվականի հունիսի 1-ից՝ Փարիզում Փաշինյանի դեմ կազմակերպված բողոքի ակցիայից հետո, Մուրադ Փափազյանը 4 անգամ անարգել այցելել է Հայաստան։ Իշխանությունները նո՞ր հիշեցին Փափազյանին ու ինչո՞ւ այդքան ուշացումով որոշեցին «պատժել» նրան։
Փափազյանն այսօր հայտնել է, որ ներկա չի եղել, չի կազմակերպել Փարիզի բողոքի ակցիաները, որ Փաշինյանի աշխատակազմի ներկայացրած տեղեկությունները սուտ են։ Նա համոզված է, որ դա Հայաստանի իշխանությունների համար ընդամենը պատրվակ է։ Եվ ինչպե՞ս հասկանալ՝ ԱԱԾ-ն չի պարզաբանում իր՝ Հայաստան մուտքն արգելելու պատճառը, Փաշինյանի աշխատակազմը՝ պարզաբանում է։ Ի՞նչ է, մարդու կյանքի գաղտնիությանն առանչվող հոդվածն այս դեպքում հեշտ ու հանգիստ շրջանցվե՞ց։
Վերջին շրջանում Փաշինյանն ու Սինանյանը արտերկրում Սփյուռքի կողմից, մեղմ ասած, լավ ընդունելության չեն արժանանում. «դավաճան»,«հողատու» վանկարկումները մշտապես ուղեկցում են նրանց այցերին: Ակնհայտ է ՝ սփյուռքում Հայաստանի իշխանությունների եւ նրանց վարած քաղաքականության հանդեպ համակրանք չկա:
Ու եթե հաշվի առնենք, որ ընդդեմ Հայաստանի իշխանությունների թրքահաճո գործունեության՝ բողոքի ակցիաներ են ացկացվում աշխարհի տարբեր երկրներում, շուտով Հայաստան շատ քիչ թվով սփյուռքահայեր կարող են գալ:
Գուցե հենց նրանց պատժելու համար էլ ԱԱԾ-ն (չպետք է մոռանալ՝ ով է որոշումների հիմնական հեղինակը) առաջարկում է սփյուռքահայերի համար խստացնել Հայաստանի քաղաքացիություն ստանալու կարգը:
Ամեն պարագայում, Փաշինյանին քննադատողները պատժվում են ՝ արտերկրում բնակվողները զրկվում են հայրեիք գալու հնարավորությունից, տեղի քննադատաները հետապնդվում են, տուգանվում, ձերբակալվում, կալանավորվում, մահանում …
