Ալիևի բախտը ո՜նց է բերել։ Ու առհասարակ բոլոր երկրների բախտն է բերել, որ Հայաստանն արդեն 5 տարի Փաշինյանն է ղեկավարում, ու նրա դրած կադրերը մեկը մյուսից «շոկոլադ են»։
Հայաստանի նախագահ Վահագն Խաչատուրյանը անկեղծ զարմացել է. «Արցախի պետական ինստիտուտները Հայաստանում գործում են՝ ի՞նչ անեն»։
Ճիշտ որ, Վահագն Խաչատուրյան, ՀՀ իշխանությունների թեթև ձեռքով Արցախի Հանրապետությունը ոչնչացվեց, սկուտեղի վրա նվիրվեց Ալիևին։
Ալիևը հիմա էլ հրաման է ստորագրել, որ Ստեփանակերտում «Ղարաբաղի համալսարան» բացվի, 30 տարի կառուցած ու բարեկարգված Արցախը հիմա վերաբնակեցվում է ադրբեջանցիներով, իսկ վարչապետի աշխատակազմի ղեկավարը հանրային հարթարկներում արդեն Նոր տարվա սեղանի անունս է անում։ Կարևորը ստամոքսն է, մնացածը՝ գրողի ծոցը։
Վահագն Խաչատուրյանն ԱԺ-ում, լրագրողների հետ ճապազրույցում մտքի փայլատակումներ է ունեցել։
«Հայաստանի Հանրապետություն կա, Հայաստանի պետական ինստիտուտները գործում են: Ի՞նչ ֆունկիցա պիտի իրականացնեն Արցախի ինստիտուտները: Արցախահայության իրավունքները Հայաստանի Հանրապետությունը պաշտպանում է: Արցախի պետական ինստիտուտները Հայաստանում գործում են՝ ի՞նչ անեն»,- լրագրողների հետ ճեպազրույցում ասել է ՀՀ նախագահ Վահագն Խաչատուրյանը:
Նա հայտարարել է, որ Հայաստանի Հանրապետությունը Արցախը Ադրբեջանի մաս ճանաչել է դեռ 1991 թվականին:
Բնականաբար հարց է առաջանում՝ եթե 30 տարի Արցախն Ադրբեջանի կազմում է ճանաչված եղել, ու ճանաչողն էլ Հայաստանի իշխանությունն է եղել, Ալիևն ինչո՞ւ է հապաղել, ինչո՞ւ «տեր չի կանգնել իր տարածքներին» , այլ բանակցային մի սեղանից մյուսն է թռել, կուլիսներում քրտնել ու գունաթափվել, որովհետև ստիպել են Արցախից վերջնականապես հետ քաշվել։
Հարցին, թե այդ դեպքում ինչու Ալիևը չէր վերցնում Արցախը այս 30 տարիների ընթացքում, ՀՀ նախագահն արձագանքեց. «Թող վերցներ, երևի չէր կարողանում»:
