Վատիկանի Կասա Մարտա տան իր նստավայրում մահացել է Հռոմի Ֆրանցիսկոս պապը. Հայտնում է Vatican News-ը։
Մահը վրա է հասել ապրիլի 21-ին՝ Զատիկին հաջորդած երկուշաբթի օրը։ Պապը 88 տարեկան էր։
Առավոտյան ժամը 9:45-ին, Առաքելական պալատի Կամերլենգոն՝ կարդինալ Քևին Ֆարելը, հայտարարել է Հռոմի պապ Ֆրանցիսկոսի մահվան. «Սիրելի եղբայրներ և քույրեր, խոր ցավով պետք է հայտնեմ մեր սուրբ հայր Ֆրանցիսկոսի մահվան մասին: Այսօր առավոտյան ժամը 7:35-ին Հռոմի եպիսկոպոսը Ֆրանցիսկոսը վերադարձավ Հոր տուն: Նրա ողջ կյանքը նվիրվեց Տիրոջը և Նրա Եկեղեցու ծառայությանը: Նա սովորեցրեց մեզ ապրել Ավետարանի արժեքներով՝ առավել հավատարմությամբ և առավել համընդհանուր սիրով: Որպես Տեր Հիսուսի իսկական աշակերտ՝ մենք փառաբանում ենք Ֆրանցիսկոս պապի հոգին Միակ և Եռամիասնական Աստծո անսահման ողորմած սիրով»:
Հիշեցնենք, որ Հռոմի Պապը փետրվարի 14-ին ընդունվել է Agostino Gemelli պոլիկլինիկական հիվանդանոց։ Ախտորոշվել էր սուր բրոնխիտ։
Հռոմի պապ Ֆրանցիսկոսի կլինիկական վիճակը աստիճանաբար վատթարացավ, և բժիշկները փետրվարի 18-ին ախտորոշեցին երկկողմանի թոքաբորբ:
38 օր հիվանդանոցում մնալուց հետո Պապը վերադարձել է Վատիկանի իր նստավայր՝ Կասա Սանտա Մարտա՝ շարունակելու իր ապաքինումը։
1957 թվականին՝ 20 տարեկանում, Խորխե Մարիո Բերգոլիոն վիրահատվել է իր հայրենի Արգենտինայում. Հեռացվել է նրա թոքի մի մասը, որը տուժել էր ծանր շնչառական վարակից։
Տարիքի հետ Հռոմի Ֆրանցիսկոս պապը հաճախակի էր տառապում շնչառական հիվանդություններից՝ նույնիսկ չեղարկելով 2023 թվականի նոյեմբերին Արաբական Միացյալ Էմիրություններ նախատեսված այցը գրիպի և թոքերի բորբոքման պատճառով:
