Միացյալ Նահանգների փոխնախագահ Ջեյ Դի Վենսի խոսքով՝ Հայաստանի ու ԱՄՆ միջև գործընկերության համար նոր սկիզբ է դրվում, և Վաշինգտոնը հպարտանում է Երևանի հետ համագործակցությամբ:
ԱՄՆ-ը Հայաստանին կմատակարարի 11 միլիոն դոլարի հետախուզական ԱԹՍ-ներ. Երևանում ՀՀ վարչապետի հետ համատեղ ասուլիսի ժամանակ հայտարարեց ԱՄՆ փոխնախագահ Ջեյ Դի Վենսը։
«Նախագահ Թրամփը շատ լավ գիտի, որ խաղաղությունն ապահովելու լավագույն ձևը ռազմական լավագույն տեխնոլոգիաների տարածումն ու տեղադրումն է։ ԱՄՆ-ը հիմա 11 միլիոն դոլարի հետախուզական դրոնային տեխնոլոգիաների վաճառք է հաստատել Հայաստանի համար։ Մենք համոզված ենք, որ այն խաղաղությունը, որ պետք է կերտվի, կմնա կայուն։ Սա նշանակում է նաև լրացուցիչ աշխատատեղերի բացում և ներդրումներ»,- հայտարարեց ԱՄՆ փոխնախագահը։
TRIPP հիմնադրամի միջոցով Հայաստան կներդրվի զգալի մասնավոր կապիտալ. հայտարարեց ԱՄՆ փոխնախագահը.
«Սկզբնական ներդրումը կազմում է 5 միլիարդ դոլար, իսկ երկրորդ փուլի համար նախատեսվում է լրացուցիչ 4 միլիարդ դոլար։ Հաստատվել է նաև 11 միլիոն դոլարի արժողությամբ անօդաչու հետախուզական տեխնոլոգիաների վաճառքը Հայաստանին»։
«Խաղաղությունը չի կերտվում զգույշ մարդկանց կողմից, խաղաղությունը չի կերտվում անցյալում, այն կերտվում է ապագայում: Հայաստանի վարչապետը, աշխատելով իմ և նախագահ Թրամփի հետ, մենք միասին Հայաստանի համար ոչ միայն խաղաղություն ենք կերտում, այլ նաև բարգավաճում ենք ԱՄՆ-ի հետ միասին։ Այսօր մենք ուզում ենք հայտարարել այնպիսի բաների մասին, որոնք առանց Ձեր առաջատարության, հանձնառությունների, ինչպես նաև ԱՄՆ նախագահի առաջնորդության, հնարավոր չէին լինի։ Համոզված եմ, որ այսօր Հայաստանի ու ԱՄՆ-ի գործընկերության համար նոր սկիզբ է դրվում»,-ընդգծեց ԱՄՆ փոխնախագահը։
Վենսի խոսքով՝ Երևանի ու Վաշինգտոնի միջև ստորագրված համաձայնագրով՝ ԱՄՆ-ն մի շարք արտոնագրեր է հաստատել NVIDIA ընկերության համար, ինչը նշանակում է նոր շուկաներ, նոր աշխատանք ինչպես ամերիկյան ընկերությունների համար, այնպես էլ հայկական։
«Սրանք կիսահաղորդիչներ են, որոնք աշխարհի մեծ մասում գոյություն չունեն և չկան։ Հիմա այստեղ՝ Հայաստանում, արդեն իսկ կառուցվում են (խմբ. նկատի ունի արհեստական բանականության սերվերային կենտրոն)՝ վարչապետ Փաշինյանի առաջնորդության արդյունքում»,-շեշտեց ԱՄՆ փոխնախագահը։
