Տեղեկությունների համաձայն՝ այս կիրակի Նիկոլ Փաշինյանը պատարագի կմասնակցի Շիրակի մարզում։ Պատարագը մատուցվելու է Սուրբ Հակոբ Մծբնեցի եկեղեցում։ Չնայած Քպ-ականները ցանկացել են, որ պատարագը մատուցի Տեր Ռուբենը, սակայն այդ օրը պատարագ մատուցելու հերթը Տեր Վարուժան ավագա քահանա Տերտերյանինն է։
Տեր Վարուժանը երեկ հայտարարել էր՝ բացառվում է, որ կզեղչի Ամենայն հայոց կաթողիկոսի անունը։
Վեհափառի անունը զեղչելու համար ասել են Տեր Ռուբենին, նրան է մոտեցել «Նոր Հայաստան, նոր հայրապետ» նախաձեռնության ակտիվիստ Կարեն Պետրոսյանն ու ասել այդ մասին, Տեր Ռուբենը, սակայն, հրաժարվել է՝ ինչքան էլ որ երկրպագում է Նիկոլ Փաշինյանին։
Երեկ ԱԱԾ աշխատակիցներն այցելել են եկեղեցի, Տեր Վարուժանն այնտեղ չի եղել, Տեր Ռուբենն է միայն ներկա եղել։
«Ինձ մարդ չի հանդիպել, խոսել են Տեր Ռուբենի հետ, ես եկեղեցում չեմ եղել»,- Aysor.am-ին ասել է Տեր Վարուժանը։
Տեր Հայրը կրկին պնդեց՝ բացառված է, որ զեղչի Վեհափառի անունը։
«Հայրապետը կա, մենք կանք, անկարելի բան է զեղչել Վեհափառի անունը»,- ասաց Տեր Վարուժանը։
Տեր Ռուբենն Aysor.am-ի փոխանցմամբ՝ նշել է, որ ԱԱԾ աշխատակիցները իրեն որևէ բան չեն հրահանգել։
«Իրենց ծառայությունն են անում, եթե վարչապետը մի տեղ է գնում, նախօրոք գնում են, անվտանգություն են ապահովում, ամեն ինչ նորմալ է, դեռ հաստատ չգիտեն էլ՝ գալո՞ւ է, թե՞ չէ, ինքն է որոշողը, ասում է՝ թագավորին չեն հարցնում՝ ուր պետք է գնա, ինչ անի, թագավորն է հրամանը տալիս»,- նշեց Տեր Ռուբենը։
Հետաքրքրվեցինք՝ այսինքն Նիկոլ Փաշինյանին թագավո՞ր է համարու՞մ՝ Տեր Ռուբենն արձագանքեց. «Բա ի՞նչ է, առաջին դեմքն է»։
Իսկ նորմա՞լ է, որ կալանավորել են Շիրակի թեմի առաջնորդ Միքայել Սրբազանին՝ Տեր Ռուբենն ասաց, թե Միքայել Սրբազանը սխալներ ու բացթողումներ է ունեցել։
«Հո՞ չեն բռնում հենց այնպես տանում, մյուս Սրբազաններին բա ինչո՞ւ չեն բռնում, տանում։ Էլի ինքը մնում է մեր Սրբազանը, աղոթում ենք իր համար, աղոթել ենք, էլի կաղոթենք, մարդ են էլի, մի քիչ ավել են խոսում, մենք բոլորս էլ սխալվում ենք։ Հասկանալի է՝ Սրբազանը ցավագին է տարել Արցախի կորուստը, դե, երկար տարիներ այնտեղ առաջնորդ է եղել, մի քիչ էմիոցիոնալ է արտահայտվել, բայց հո ինքը թշնամի՞ չէ մեր պետությանը, բայց եթե որոշել են ձերբակալել, դա պետության գործն է, մենք ի՞նչ գործ ունենք խառնվելու»,- ասաց Տեր Ռուբենը։
Չնայած այս ամենին, միևնույն է, Տեր Ռուբենը պնդում է՝ ինչքան էլ հորդորեն իրեն՝ չի զեղչի Վեհափառի ու իր թեմի առաջնորդի անունը։
«Կարո՞ղ է ես վարչապետի ենթական եմ, ես քահանա եմ, Հայրապետը մնում է Հայրապետ, լավն է, վատն է, բողոքում են, ինչ են անում… հա, մենք էլ կուզեինք սուրբ լիներ, բայց հիմա սա է, ի վերջո, գործող Հայրապետ է։ Ես չեմ շարժվում մարդկայինով, ես շարժվում եմ Աստծո խոսքով ու սուրբ եկեղեցու պատգամներով»,- ընդգծեց Տեր Ռուբենը։
Տեր Ռուբենը հաստատեց, որ իր որդին Պետական պահպանության ծառայության աշխատող է եղել։
«Բայց ժամանակին, վաղուց արդեն դուրս է եկել»,- հավելեց Տեր Հայրը։
