Նիկոլ Փաշինյանը Շվեյցարիայի մի խումբ հայ ներկայացուցիչների հետ հանդիպմանը ներկայացնում է, թե Հայաստանի կառավարությունն ինչով է զիջում աշխարհի լավագույն կառավարություններին: Փաշինյանն ընդունում և անհերքելի է համարում քննադատությունը, որ ՀՀ կառավարությունը դանդաղ է աշխատում, ծրագրերը դանդաղ են առաջ ընթանում: Սակայն, ըստ Փաշինյանի աշխարհի բոլոր կառավարություններն են դանդաղ աշխատում:
«Հայաստանի կառավարությունը աշխարհի լավագույն կառավարություններից ավելի դանդաղ է աշխատում մի պարզ պատճառով, որ երկու պարամետրով զիջում է բոլոր լավագույն կառավարություններին. առաջինը՝ կադրերի պրոֆեսիոնալիզմի հարցում ենք զիջում լավագույն կառավարություններին: Երկրորդը՝ աշխարհի բոլոր առաջատար կառավարություններին զիջում ենք աշխատանքի վարձատրության չափով:
Իսկ ինչո՞ւ ենք պրոֆեսիոնալության մակարդակով զիջում, որովհետև Հայաստանում կրթության մակարդակն այնպիսին չէ, որ կարողանա պետության համար պատրաստել արժանի պրոֆեսիոնալության կադրեր: Իսկ նրանց, որոնք արժանի պրոֆեսիոնալություն ունեն, շատ դժվար է համոզել, որ գան 200, 300,400, նույնիսկ 500 հազար դրամով աշխատեն, եթե իրենք կարող են մասնավոր հատվածում դրանից 10 անգամ ավելի աշխատավարձ ստանալ»,– ասում է Փաշինյանը՝ հավելելով, որ դա հայրենասիրության խնդիր չէ, շատերն, օրինակ, իրենց կրթության համար վարկ են վերցրել, տուն են վաճառել:
Փաշինյանը նաև նշում է՝ եթե Կառավարությունը որոշի պաշտոնյաների աշխատավարձը բարձրացրել, ժողովրդի շրջանում դժգոհության ալիք կբարձրանա:
