«Ուժեղ Հայաստան» կուսակցության պաշտոնական շնորհանդեսի ժամանակ ներկայացվել է կուսակցության վարչապետի թեկնածու Սամվել Կարապետյանի ուղերձը, որը ներկայացնում ենք ստորև։
Սիրելի՛ հայրենակիցներ, գործընկերնե՛ր և համախոհնե՛ր,
2025 թվականի հուլիսի 4-ին, երբ դեռ մեկ ամիսը կալանքից չէր լրացել, դիմեցի ձեզ ու ասացի իմ նախաձեռնության մասին, որն այսօր իրականություն է դառնում։ Այդ օրը միասին որոշեցինք, որ միասնական, մեկ բռունցք դառնալով՝ մտնում ենք քաղաքական պայքարի մեջ՝ հանուն մեր հայրենիքի լավ ապագայի։ Ինձ կալանավորելով, կալանքի տակ պահելով՝ «փոքրիկ խմբակը» կարծում էր, որ կլռեցնեն, կմեկուսացնեն ոչ միայն ինձ, այլև Հայաստանի ձայնը, մեր ժողովրդի ձայնը, մեր քաղաքացու ձայնը, ձեր բոլորի ձայնը։ Բայց նրանք հերթական անգամ սխալվեցին ու ձախողեցին։
Հիմա մեր ձայնն ավելի բարձր է հնչում։ Հիմա մենք ձեզ հետ ավելի ուժեղ ենք, քան երբևէ։ Այսօր ևս մեկ անգամ հաստատում ենք, որ Հայաստանում քաղաքական վիճակը վերջնականապես փոխվել է, ու «փոքրիկ խմբակը»-ն այլևս ուժ չունի իր թուլացած դիրքերը վերականգնելու։
Ժողովուրդը դժգոհ է իշխանություններից։ Հասարակության մեծ մասը վերջնականապես հիասթափված է, քանի որ իշխանությունը ձախողել է ամեն ինչ՝ արտաքին քաղաքականությունը, ներքին քաղաքականությունը, սոցիալական ոլորտը։ Տնտեսության վիճակը կարելի է բնորոշել մեկ նախադասությամբ՝ աղքատ ենք ու խրված պարտքերի մեջ։ Մեր երկրին ամեն տեսակի արհավիրք, դժբախտություն ու թուլություն բերածները վերջին շրջանում միայն խոստանում են և խոսում են մի բանից՝ թույլ խաղաղությունից։
Խաղաղություն՝ առանց ուժեղ պետության, կոչվում է հանձնվել։ Նրանք հանրությանը մոլորեցնում են, թե իբր ուժեղ բանակ ունենալը համարժեք է պատերազմի։ Սա հերթական սուտն է՝ հանրությանը վախեցնելու համար։ Մենք ուզում ենք խաղաղություն, ուզում ենք ուժեղ և արժանապատիվ խաղաղություն։ Աշխարհում ոչ մի երկիր չի կարող իրական խաղաղության մասին բանակցել՝ խաղաղություն աղերսելով։ Մենք կուժեղացնենք մեր բանակն ու պաշտպանությունը՝ նոր տեխնոլոգիաների ներդրմամբ, ժամանակակից պաշտպանության ծրագրի մշակմամբ և դրա ներդրմամբ, որովհետև ուժեղ խաղաղությունը պահանջում է ուժեղ ու ժամանակակից բանակ»,- նշված է ուղերձում։
