Կասկածից վեր է, որ պաշտոնական Բաքուն փորձելու է Իրանի նախագահի՝ Ադրբեջան կատարած այցի ընթացքում հակահայ օրակարգ առաջ քաշել, սակայն պետք է վստահ լինել, որ Իրանը պաշտպանելու է սեփական շահերը։ Իսկ այդ շահերը պահանջում են, որ այսպես կոչված Զանգեզուրի միջանցք չլինի, Azg.am-ի թղթակցի հետ զրույցում ասաց իրանագետ Էմմա Բեգիջանյանը։
«Մի առիթով գրել եմ, որ անգամ այն կոնֆերանսները, որոնք կիլոմետրորով հեռու են քաղաքականությունից, Բաքուն 35 տարի շարունակ օգտագործել է Հայաստանից բողոքելու համար, դրա համար էլ մենք տանուլ ենք տվել քարոզչական պայքարը։ Այսօր առավել ևս նույնն է։ Ալիևն անշուշտ կաշխատի ամենատարբեր հարցերում մեղադրել Հայաստանին, սակայն պետք է հաշվի առնել, որ Իրանը պաշտպանելու է իր շահերը։
Իրանը, որպես «Զանգեզուրի միջանցքի» այլընտրանք, կառուցում է Արազի միջանցքը, և Թեհրանը հույս ունի, որ այն կլինի միակ ճանապարհը, որն Ադրբեջանի արևմտյան հատվածը կմիացնի Նախիջևանին։ Իրանն աշխատում է օր առաջ կառուցել այդ միջանցքը, սակայն Ադրբեջանը նպատակ ունի, որ Արազի միջանցքն այլընտրանք կլինի «Զանգեզուրի միջանցքին»»,- ասաց իրանագետը։
Ըստ Էմմա Բեգիջանյանի՝ իրանական լրատվամիջոցները տեղեկացնում են, որ Բաքու կատարած այցի ընթացքում Մասուդ Փեզեշքիանին ուղեկցում է բավական մեծ պատվիրակություն, որի կազմում են գիտական, տնտեսական, արդյունաբերական և այլ ոլորտների նախարարներ։
«Կրկնում եմ՝ Իրանը բացասական առումով չի արձագանքելու Բաքվի՝ Հայաստանի հասցեին հնչեցրած մեղադրանքներին։ Բոլոր դեպքերում, Իրանի նախագահի այցը Հայաստանի համար որևէ բացասական ազդեցություն չի ունենալու։ Սրա մասին կարելի է հաստատապես պնդել։
Մեկ բան ևս պետք է հաշվի առնել. Ադրբեջանի գոյացումն ընդդեմ Իրանի տարածքային ամբողջականության է։ Ինչպես ժողովուրդն է ասում՝ Ադրբեջանը ծնվել է Իրանի «ինադու», դրա համար էլ երկու երկրների փոխհարաբերությունները երբեք էլ մշտական կայուն-բարեկամական չեն լինելու։
Տեսեք, ուժեղ անկումից հետո Իրան-Ադրբեջան հարաբերությունները հիմա աստիճանաբար վերելք են ապրում։ Դա կապված է երկու երկրների նպատակների ու շահերի հետ»,- ասաց մեր զրուցակիցը։
Ամփոփելով՝ Էմմա Բեգիջանյանը չբացառեց, որ պաշտոնական Բաքուն, իր սովորության համաձայն, քարոզչական պատերազմի համատեքստում փորձի խեղաթյուրել Իրանի նախագահի՝ Հայաստանի վերաբերյալ արտահայտած մտքերն ու հայտարարությունները։
«Ադրբեջանական տեղեկատվական ապարատն ամեն ինչի ընդունակ է։ Նման հանդիպումների ընթացքում երբեմն քաղաքական հաճոյախոսություններ են հնչում՝ «Մենք եղբայրներ ենք, նույն կրոնն ունենք» և այլն, որոնք Բաքվի կողմից կարող են իրեն շահեկան համատեքստում օգտագործվել։ Հանկարծ մի լեզվի սայթաքում (իսկ Փեզեշքիանի մոտ նման բաներ երբեմն պատահում են), և ահա՝ Բաքուն դա շատ արագ կօգտագործի»,- ամփոփեց իրանագետը։
Հիշեցնենք, որ ԻԻՀ նախագահ Մասուդ Փեզեշքիանը պաշտոնական այցով այսօր ժամանել է Բաքու։ Սպասվում է, որ մեկօրյա այցի ընթացքում Իրանի նախագահը երկկողմ հանդիպում կունենա իր ադրբեջանցի գործընկերոջ հետ։
