ՄԱԿ-ում Իրանի դեսպանը լուրջ նախազգուշացում է տվել ցանկացած ռազմական արկածախնդրության դեմ՝ ընդգծելով. Իրանը արագ և վճռական պատասխան կտա ԱՄՆ-ի ցանկացած ագրեսիվ գործողությանը։
Ինչպես հաղորդում է Pars Today-ը՝ վկայակոչելով IRNA-ին, ՄԱԿ-ում Իրանի դեսպան Ամիր Սաիդ Իրավանին երկուշաբթի օրը նամակ է գրել Անվտանգության խորհրդի նախագահ Քրիստինա Մարկուս Լասենին և ՄԱԿ-ի գլխավոր քարտուղար Անտոնիո Գուտերեշին, որով ԱՄՆ նախագահ Դոնալդ Թրամփի «անխոհեմ և թշնամական հայտարարությունները» որակել է որպես միջազգային իրավունքի և ՄԱԿ-ի կանոնադրության հիմնարար սկզբունքների, հատկապես 2-րդ հոդվածի 4-րդ կետի կոպիտ խախտում։
Իրավանին հստակեցրել է․ «Իրանի Իսլամական Հանրապետությունը լուրջ նախազգուշացում է տալիս ցանկացած ռազմական արկածախնդրության նկատմամբ և հայտարարում է, որ արագ և վճռական պատասխան կտա իր ինքնիշխանության, տարածքային ամբողջականության կամ ազգային շահերի դեմ ԱՄՆ-ի կամ նրա վստահված ուժի, մասնավորապես՝ Իսրայելի ռեժիմի ցանկացած ագրեսիվ գործողությանը կամ հարձակմանը»:
ՄԱԿ-ում Իրանի դեսպան, մշտական ներկայացուցիչը հավելել է. «Իրանի Իսլամական Հանրապետությունը շարունակում է հավատարիմ մնալ տարածաշրջանային խաղաղությանը, կայունությանը և անվտանգությանը, չի ձգտում հակամարտության կամ էսկալացիայի, և ցանկացած թշնամական գործողության ծանր հետևանքների ողջ պատասխանատվությունը կկրի Միացյալ Նահանգները»:
Տարածաշրջանում Սիոնիստական ռեժիմի շարունակական չարագործություններից և ԱՄՆ նախագահի սպառնալիքներից հետո նախօրեին Թեհրանում ԱՄՆ շահերի պաշտպանը հանդիսացող Շվեյցարիայի դեսպանի պաշտոնակատարը, այդ երկրի դեսպանի բացակայության պայմաններում, Իրանի ԱԳ նախարարություն է կանչվել նախարարության ամերիկյան հարցերով գլխավոր վարչության տնօրեն, նախարարի օգնականի կողմից, որտեղ նրան է փոխանցվել Իրանի նախազգուշացման պաշտոնական նոտան:
Դատապարտելով և մերժելով լարվածություն հրահրող և միջազգային իրավունքին ու ՄԱԿ-ի կանոնադրությանը հակասող հայտարարությունները՝ ԱԳՆ-ի Ամերիկայի հարցերով գլխավոր վարչության տնօրեն Իսա Քամելին Թեհրանում ԱՄՆ շահերի պաշտպանը հանդիսացող Շվեյցարիայի դեսպանի բացակայության պայմաններում դեսպանի պաշտոնակատարին է փոխանցել Իրանի նախազգուշացման պաշտոնական հուշագիրը՝ ցանկացած չարագործությանը և ցանկացած սպառնալիքին Իրանի Իսլամական Հանրապետության վճռական և անհապաղ պատասխանի վերաբերյալ:
