Այսօր կայացած մամուլի ասուլիսի ժամանակ ԿԸՀ նախագահ Վահագն Հովակիմյանը հայտարարեց՝ կան տեխնիկական կարիքներ, որոնք առաջիկայում լուծվելու են միջազգային գործընկերների հետ համագործակցության արդյունքում։ Ըստ այդմ՝ այս փուլում աջակցությունը Կենտրոնական ընտրական հանձնաժողովին կազմելու է 3 միլիոն դոլարին համարժեք: Հիմնական շեշտը դրված է լինելու տեխնիկայի վերազինման վրա:
Ըստ Վահագն Հովակիմյանի՝ սարքերի ամբողջ խմբաքանակը 4500 հատ է, որոնցից ԱԺ ընտրությունների ժամանակ օգտագործվում են 4000-ը:
«Համապետական ընտրությունների ժամանակ 500-ը ռեզերվն է: Եկող տարի լինելու է 9 տարի, ինչ այդ սարքերն օգտագործվում են, և դրանցից 450-ը խնդիրներ ունեն: Մեր ամբողջ խմբաքանակը բավարարում է գալիք ընտրություններին»,- ասաց նա։
Վահագն Հովակիմյանը միաժամանակ շեշտեց՝ ընտրությունների ժամանակ բոլոր ընտրատարածքներում առկա են լինում որոշակի խմբաքանակով սարքեր, որպեսզի անհրաժեշտության դեպքում խնդիր ունեցող սարքն արագ փոխվի:
