Իզաբել Ժեֆռուան կամ աշխարհը ակուստիկ քնքշությամբ նվաճած Զազը Հայաստանում է։ Տասը տարի պահանջվեց երգչուհուն համերգային ծրագրի շրջանակում Հայաստան հրավիրելու համար։ Հունիսի 24-ին՝ լրագրողների հետ հանդիպման ժամանակ, հարցին, թե ո՞րն է երգչուհու մեղեդու գրավչությունը և բազմազգ երաժշտասերին գրավելու գաղտնիքը, կատակով պատասխանել է.
«Երևի թե հին ֆրանսիական ձայնս, որ նոր ելևէջումներ կիրառելով՝ ստացվում է այն, ինչ ստացվում է»։
2011 թվականին Զազը «Եվրոպան առանց սահմանների» մրցանակաբաշխության հաղթողն էր, և այդպիսով սկիզբ առավ երգչուհու ակտիվ կարիերան և ակտիվ շրջագայությունների փուլը։
Հիրավի միլիոնավոր սրտեր գրաված «Ժը վյու» երգը հայ հանդիսատեսն արդեն հնարավորություն ունի լսել կենդանի կատարմամբ, և վայելել սիրելի արտիստի ներկայությունը Երևանում։
«Հուզված եմ, որ Հայաստանում եմ, քանի որ սա Շառլի հայրենիքն է»,- ասում է երգչուհին՝ հավելելով, որ իր հետ միշտ մի կտոր Հայաստան ունի. շատ է սիրում դուդուկի ձայնը և պարբերաբար լսում է դուդուկահար Լևոն Մինասյանի ձայնասկավառակները։ Իսկ այն մասին, թե Ազնավուրն ինչ բնորոշում էր տվել իրեն՝ համեմատելով Էդիթ Պիաֆի հետ և ֆրանսիական երգարվեստի ապագան տեսնելով իր երգերում, Զազը համեստորեն պատասխանեց.
«Իհարկե, ինձ համար պատիվ է լսել այդ խոսքերը, այն էլ Շառլից, սակայն մի քանի ֆրանսիացի արտիստներ էլ կան, որոնք պահպանում և փոխանցում են Փարիզի մշակութային դեմքը»։
Հունիսի 25-ին Զազի համերգով կտրվի «Հայա» փառատոնի մեկնարկը, որի շրջանակում հյուրերից մեկն էլ աշխարհահռչակ ռեփեռ Ֆիֆթի Սենթն է։
