Հայոց եկեղեցու պահպանության համահայկական խորհրդի նախագահ Հարություն Աղա-Սարգսյանը հանդես է եկել հայտարարությամբ՝ կարգալույծ հռչակված Արման Սարոյանին (նախկին Գևորգ եպիսկոպոս) Նիկոլ Փաշինյանի կողմից «Ներման հարցերի քննարկման խորհրդակցական հանձնաժողովի» անդամ նշանակելու կապակցությամբ:
Հայտարարության մեջ ասված է.
«Հայոց Եկեղեցու պահպանության համահայկական խորհուրդը լկտի ու էժանագին սադրանք է որակում ՀՀ վարչապետի խայտառակ որոշումը։ Արման Սարոյանին՝ Եկեղեցուց շպրտված, կարգալույծ արված նախկին Գևորգ եպիսկոպոսին, որպես Հայաստանյայց Առաքելական Սուրբ Եկեղեցու «ներկայացուցիչ» պետական հանձնաժողովում խցկելը պետական մակարդակի ցինիկ կեղծարարություն է և բացահայտ ապտակ ազգային արժանապատվությանը։
Հայաստանյայց Առաքելական Սուրբ Եկեղեցին ձեր գրպանային կառույցը կամ նախարարության ենթակայության ՊՈԱԿ չէ, որ ում ուզեք, երբ ուզեք՝ դարձնեք նրա «ներկայացուցիչը»։ Հայոց Եկեղեցու անունից խոսելու, հանդես գալու իրավունք տալիս է միայն Մայր Աթոռ Սուրբ Էջմիածինն ու Ամենայն Հայոց Կաթողիկոսը։ Որևէ արկածախնդիր չինովնիկ կամ վարչապետ իրավունք չունի իր հիվանդագին հայեցողությամբ «նշանակումներ» անել և պետական ակտերով պաշտոնականացնել իր իսկ հորինած զառանցանքները։
Սա ցինիզմի գագաթնակետն է։ Երբ պետական ապարատը փորձում է իր կամքը պարտադրել Եկեղեցուն, նա անցնում է բանականության բոլոր կարմիր գծերը։ Իսկ կարգալույծ եղած, Եկեղեցու և Աստծո կողմից մերժված անձին որպես Եկեղեցու դեմք ներկայացնելը ուղիղ թուք է՝ ուղղված միլիոնավոր հայ հավատացյալների երեսին։
Մենք պահանջում ենք անհապաղ աղբանոց նետել վարչապետի այն կեղծ որոշումը, որով կարգալույծ Արման Սարոյանը հռչակվել է Եկեղեցու ներկայացուցիչ, ինչպես նաև հրապարակավ և պաշտոնապես հերքել պետական ակտով շրջանառության մեջ դրված այս հիմարությունը:
Այս գործողությունները ձեզ համար անհետևանք չեն մնալու։ Դուք վտանգավոր խաղ եք սկսել՝ փորձելով վերջնականապես քանդել պետություն-Եկեղեցի հարաբերությունները և ազգային հոգևոր հաստատությունը շահարկել ձեր զառանցական նպատակների համար։ Նման վարքագծի ազգային, բարոյական և իրավական պատասխանատվությունը լինելու է ծանր ու անխուսափելի։
Հայոց Եկեղեցու պահպանության համահայկական խորհուրդը հայտարարում է՝ մենք հետևողականորեն և անխնա պայքարելու ենք Եկեղեցու դեմ ուղղված յուրաքանչյուր ապօրինի և լկտի դրսևորման դեմ»:
