Հայաստանյան իրականության մեջ տնտեսության մի խոշոր բնագավառ տարիների ընթացքում դարձել է տասնյակ հազարավոր տնային տնտեսությունների միակ եկամտի գեներացման վայր։ Տաքսի ծառայություն. որն իր աշխատակիցների, փոխկապակցված անձանց, շրջանառության ցուցանիշներով բավարար նկատելի երևույթ է։
Հիմա կարելի է վստահորեն պնդել, որ այդ բնագավառն ամենամեծ ստվերային շրջանառության կրողն է, և այս իմաստով այդ բնագավառի տնտեսվարողների ու պետության միջև ստեղծվել է բացառիկ հանցավոր կարտելային համաձայնություն։
Դուք չեք զբաղվում քաղաքականությամբ, ես չեմ իրականացնում բնագավառի անհրաժեշտ իրավական կարգավորումներ։
Իսկ ի՞նչ պետք է աներ պետությունն այդ բնագավառում, և ինչ չի արվում՝ շրջանցելով բազմաթիվ օրենքներ և նորմատիվ ակտեր։
1.Ոչ մեկ տաքսու մեջ տեղադրված չէ ՀԴՄ, բնագավառի ամբողջ շրջանառությունը ստվերային է։ Չկա ծառայության մատուցման փաստը, գին , գումարը ֆիքսող որևէ փաստաթուղթ, կտրոն, որը կարտացոլվեր պետական վիճակագրական ծառայության մատյաններում։
Փաստացի ունենք իրավիճակ, երբ օրական մի քանի մլրդ դրամի շրջանառությունը որևէ կերպ չի դիտարկվում, բացառիկ հանցավոր կերպով ամբողջ հասույթը դուրս է վերահսկողական լիազոր մարմինների ուշադրությունից։ Կարո՞ղ է այսպիսի բան իրեն թույլ տալ, օրինակ, մի կրպակ՝ ավելի փոքր շրջանառությամբ: Իհարկե, ոչ , կաշին կքերթեն ժամերի ընթացքում։
2. Որևէ տաքսի չի իրականացնում կանխիկի սահմանափակումների վերաբերյալ օրենքի դրույթները։ Կարո՞ղ է այսպիսի բան իրեն թույլ տալ որևէ փոքրիկ կրպակ՝ ավելի փոքր շրջանառությամբ: Իհարկե, ոչ, կաշին մեկ անգամ ևս կքերթեն ժամերի ընթացքում ։
3. Որևէ տաքսի չի վարում դրամարկղային էլեկտրոնային գիրք, որտեղ պարտադիր կլինեին հասույթի իրական տվյալները։ Կարո՞ղ է նման բան իրեն թույլ տալ որևէ կրպակ: Իհարկե, ոչ , կաշին 3-րդ անգամ կքերթեն ժամերի ընթացքում ։
4. Որևէ տաքսի չի ընդունում visa կամ այլ վճարային քարտերով վճարումներ։ Կարո՞ղ է նման բան իրեն թույլ տալ որևէ կրպակ: Իհարկե ոչ, կաշին 4-րդ անգամ կքերթեն ժամերի ընթացքում։
Հարգելի հայրենակիցներ, իշխանությունը քաղաքական նկատառումներով չի էլ փորձում տեսնել մեր մատնանշած բնագավառի ստվերային ինդուստրիան։ Չեն փորձում կարգավորել, կառավարել այն։
Արդյունքում հացթուխը, ինժեները, մանկավարժը, սպան, զինվորը վճարում են հարկեր, եկամտահարկ, իսկ մի քանի տասնյակ հազար անձիք պարզապես դուրս են հարկային դաշտից։ Արդարության համար նշենք, որ օնլայն տաքսի ծառայությունների հետ համագործակցողների մասով կա մի չնչին հարկային բեռ, որը մեծապես շրջանցվում է, և ըստ երևույթին մեռելածին, բուտաֆորիկ կարգավորում է։
Այսպիսով, կարող ենք արձանագրել, որ հայաստանյան իշխանությունը դիտավորյալ աչքաթող է արել մի ահռելի բնագավառ, և դա այն դեպքում, որ այդտեղի հարկային մուտքերով զգալի կբարելավվեր հայոց բանակի, հայ զինվորի վիճակը։
Վստահորեն կարող ենք իշխանության գլխին կանգնած հեծանվորդի խմբակին ուղղել իրենց իսկ խոսքերը՝ դուք զինվորի հաց եք գողանում ձեր ապիկարությամբ և դիտավորյալ անգործությամբ։
Հրայր Կամենդատյան, տնտեսագետ
