«Գոյ» թատրոնը 2 օր առաջ հայտարարություն էր տարածել. «Նոյեմբերի 4-ին ժամը 11:00-ին «ԳՈՅ» ԹԱՏՐՈՆԸ կվերսկսի իր գործունեությունը և կլինի մամուլի ասուլիս՝ «ներկա իրավիճակը և հետագա անելիքները» թեմայով:
Թատրոնի փաստաբան Կարո Ասատրյանը «Գոյի» ներկայացուցիչների հետ նշված ժամին մտավ Սունդուկյանի անվան ազգային ակադեմիական թատրոն, որպեսզի տնօրենին ներկայացնի Արդարադատության նախարարությունից ստացած փաստաթուղթը, հարցը քննարկեն, ու «Գոյը» վերսկսի իր աշխատանքը իր բեմում։
Սունդուկյան թատրոնի տնօրեն Վարդան Մկրտչյանը նրանց հրավիրեց ներսում խոսելու։ Լրատվամիջոցների ներկայությամբ նա ցանկացավ խոսել իր ու «Գոյի» ներկայացուցիչների՝ մինչ այժմ տեղի ունեցած բանակցություններից, սական «Գոյի» ներկայացուցիչները չհամաձայնեցին՝ պնդելով, որ իրենք եկել են Արդարադատության նախարարությունից ստացած փաստաթղթի հիմքերը քննարկելու։ Վարդան Մկրտչյանն էլ իր հերթին պնդեց, որ այլ թեմաներից էլ է ուզում խոսել։ Տեղի ունեցավ բանավեճ. «Գոյի» ներկայացուցիչները բոյկոտեցին Մկրտչյանի հանպատրաստից ասուլիսը և դուրս եկան թատրոնից։
Վարդան Մկրտչյանը ասաց, որ «Գոյին» իր բեմում աշխատելու թույլտվության իրավական ոչ մի հիմք չկա։ Վարչական դատարանը «Գոյի» փաստաբան Կարո Ասատրյանի՝ Սունդուկյանի՝ «Գոյի» գույքը օգտագործելու արգելքի, նաև մինչ դատական վճռի կայացումը «Գոյի»՝ իր բեմում աշխատելու միջնորդությունը մերժել է։
Սունդուկյանի տնօրենը նաև պատմեց, որ «Գոյին» մայր թատրոնի բեմում աշխատելու լավ պայմաններ են առաջարկել, նաև առաջարկել են ամեն շաբաթ և կիրակի ներկայացումներ խաղալ՝ պահպանելով իրենց խաղացանկը, բայց մերժում են ստացել։
«Գոյից» ոչ ոք ներկա չէր, որպեսզի հաստատեր կամ հակադարձեր Մկրտչյանին, քանի որ 3 ներկայացուցիչներն էլ դուրս էին եկել ասուլիսի սրահից։
Մանրամասները՝ տեսանյութում
