«Միասնության թևեր» կուսակցությունն այսօր քարոզարշավ է իրականացնում Կոտայքի մարզում։ Արման Թաթոյանը քայլերթին չի մասնակցում։
Կուսակցության կառավարման խորհրդի անդամ, պատգամավորության թեկնածու Դավիթ Անանյանը նախընտրական բուկլետներ է բաժանում աբովյանցիներին, հորդորում կարդալ իրենց նախընտրական ծարագրերը և ձայնը տալ ճիշտ քաղաքական ուժի։ Որոշ քաղաքացիներ ողջունում են «Միասնության թևեր»-ի անդամներին, վերցնում բուկլետները, ոմանք՝ հրաժարվում։
Վերցնողների հետ Անանյանը կատակում է՝ ճաշակով են, որ համակրում են «Միասնության թևեր»-ին։
Մի տղամարդ էլ, ողջունելով քաղաքական ուժի ներկայացուցիչներին, ասաց.
«Արման Թաթոյանը լավ էլ ղայդին տղա ա, նամուսով-թասիբով»։
Քաղաքացիներից մեկն էլ «Միասնության թևեր» կուսակցության պատագամավորի թեկնածու Դավիթ Անանյանից հետաքրքրվեց՝ եթե ընտրվեն, ինչպե՞ս են լուծելու Աբովյանի վթարային հանրակացարաններում վարձով ապրողների հարցը։ Քաղաքացու հետ հարցուպատասխանը եթերում չլսվեց՝ քաղաքացու իսկ խնդրանքով։
Հատկանշական է, որ Անանյանը բազմաթիվ արցախցիների հանդիպեց՝ նրանց հետ զրույցներում նշելով, որ իր մայրն էլ արցախցի է։
Նա արցախցի մի կնոջից հետաքրքրվեց՝ եթե միջազգային երաշխիքներ լինեն, կցանկանա՞ն վերադառնալ Արցախ։ Կինը դրական պատասխան հնչեցրեց։
Անանյանը աբովյանցիներին ասաց՝ պետք է իշխանափոխություն անել և վերջապես ազատվել գործող իշխանություններից։
«Երկրին առատություն լինի, խելքը գլխին կառավարիչ լինի։ Բոլորով գնացինք, իրեն կարգեցինք մեզ ղեկավար (նկատի ունի Նիկոլ Փաշինյանին՝ խմբ.), հիմա պետք է մեր սխալն ուղղենք։ Պիտի լսեինք իր օղորմածիկ հորը, ուղիղ եթերում ասեց…»,- ասաց Դավիթ Անանյանը։
