Մենք ընտրել ենք ճկուն մոդել, բայց չնայած մեր վճռականությանը՝ իմաստալից ու բովանդակալից միավորում առաջարկվելու դեպքում կարող ենք գնալ կոմպրոմիսային ծրագրի ստեղծման ուղղությամբ: Ընդունելի թեկնածուներից չեմ խոսի, բայց ակնհայտ է, որ հիմա կա ֆավորիտ՝ Սամվել Կարապետյանի քաղաքական ուժը, իրենց հետ բանակցում ենք: Այս մասին լրագրողների հետ զրույցում ասել է Հայ ազգային կոնգրեսի փոխնախագահ, ՀԱԿ-ի վարչապետի թեկնածու Լևոն Զուրաբյանը:
«Ես խոսում եմ լայն համախմբման մասին, այն քաղաքական ուժերը՝ որոնք իրատեսական են ու կիսում են մեր ծրագրերը, կարող են նույն ցուցակով գնալ ընտրությունների:
Նիկոլ Փաշինյանի մասով՝ իրենք ասում են, որ լավ թե վատ, բայց խաղաղության ծրագիր ունեն ու ալտերնատիվ չկա, բայց սա մեծ սուտ է, քանի որ «Հայ ազգային կոնգրես»-ը հանդես է եկել ծրագրով, որի գլխավոր գաղափարը կայանում է նրանում, որ ստեղծվի Հայաստանը Իրանին կապող երկաթուղի, դա շատ լավ մշակված պրոեկտ է: Մենք մեր ձեռքում դա ունենք, ու իշխանության գալուց առաջին խնդիրը դրել ենք աշխարհաքաղաքական բալանսը վերականգնելը:
Մենք հասկանում ենք, որ կան միջազգային պարտավորություններ ու դրանք մերժել չենք կարող, բայց կարող ենք բարելավվել խաղաղության պրոցեսը՝ վերականգնելով մեր ինքնիշխան իրավունքը: Ես շատ մեծ անվստահություն ունեմ Նիկոլ Փաշինյանի հայտարարություների վերաբերյալ, հիմա խաղաղության ոչ մի երաշխիք չկա, սա ընդամենը նախընտրական զինադադար է, որը Ալիևը կնքել է Հայաստանի հետ միայն մեկ նպատակով՝ Հայաստանում Նիկոլ Փաշինյանի իշխանությունը ամրապնդելու»:
Infoport.am
