Մայիսի 13-ին «Նարեկացի» արվեստի միության դահլիճում տեղի ունեցավ «Այս գունավոր աշխարհը սեւ-սպիտակ լուսանկարներով» խորագրով լուսանկարչական ցուցահանդեսի բացումը: Ցուցահանդեսում ներկայացված են Հայկական պետական մանկավարժական համալսարանի Կուլտուրայի ֆակուլտետի Օպերատորության, գեղարվեստական լուսանկարչության ամբիոնի ուսանողների եւ շրջանավարտների լուսանկարչական աշխատանքները: Ցուցահանդեսում ներկայացված են 50 ից ավել լուսանկարներ:
Բացման խոսքով հանդես եկավ արվեստաբան Տաթեւիկ Համբարձումյանը: Ցուցահանդեսի կազմակերպիչ, ՀՊՄՀ Կուլտուրայի ֆակուլտետի Օպերատորության,գեղարվեստական լուսանկարչության ամբիոնի ասիստենտ Արմեն Խաչատրյանը իր խոսքում կարեւորեց լուսանկարչության դերը արդի ժամանակներում: Նա ուսանողներին առաջարկեց համարձակ աշխատել եւ նոր լուսանկարչական արտահայտչամիջոցներ կիրառել:
ՀՊՄՀ Կուլտուրայի ֆակուլտետի Օպերատորության, գեղարվեստական լուսանկարչության ամբիոնի վարիչ Ռուբեն Երզնկյանը ողջունեց ցուցահանդեսի մասնակիցներին կարեւորեց լուսանկարչական ցուցահանդեսների դերը ուսանողների գեղագիտական ճաշակը ձեւավորելու գործում: Պարոն Երզնկյանը ընդգծեց, որ մեծ հաջողություն է նման ցուցահանդեսում ներառել ամբիոնի շրջանավարտների ինչպես նաեւ բոլոր առկա, հեռակա եւ մագիստրատուրա կուրսերի ուսանողների աշխատանքների ներկայացումը ցուցահանդեսում:
Արմեն Խաչատրյանը առաջարկեց ավելի շատ հետաքրքիր լուսանկարներ նկարահանող երիտասարդների աշխատանքները ներառել այսպիսի ցուցահանդեսներում, որպեսզի կարեւորվի գեղարվեստական լուսանկարչությունը երիտասարդների շրջանակում:
«Այս գունավոր աշխարհը սեւ-սպիտակ լուսանկարներով» խորագրով լուսանկարչական ցուցահանդեսը նախատեսված է ներկայացնել նաեւ այլ ցուցասրահներում:
