ՀՀ Գիտությունների ազգային ակադեմիայում 2024թ. նոյեմբերի 5-7-ը տեղի ունեցավ «Պարույր Սեւակ 100» հոբելյանական գիտաժողովը՝ նվիրված հայ անվանի բանաստեղծ, մշակութային գործիչ, գրականագետ, թարգմանիչ Պարույր Սեւակի 100-ամյակին: Գիտաժողովի մասնակիցներին ողջունեց ԿԳՄՍ-ի նախարար Ժ. Անդրեասյանը: Նա նշեց, որ Պ. Սեւակի թողած ժառանգությունը բազմաշերտ է, եւ այս գիտաժողովը հնարավորություն է մանրամասն անդրադառնալու մեծ բանաստեղծի գիտական ու գրական գործունեությանը:
ՀՀ ԳԱԱ Հայագիտության եւ հասարակական գիտությունների բաժանմունքի ակադեմիկոս-քարտուղար, ՀՀ ԳԱԱ ակադեմիկոս Յուրի Սուվարյանը նշեց. «Մեր խնդիրն է այսօրվա չափանիշներով մեկ անգամ եւս արժեւորել Պարույր Սեւակի թողած հարուստ ժառանգությունը՝ եւ՛ գրական, եւ՛ գիտական, որպեսզի իրազեկվի այսօրվա սերունդը Սեւակի համամարդկային եւ հայրենասիրական գաղափարներին, հայ մարդու քաղաքակրթական մակարդակը բարձրացվի այդ գաղափարների հիմքի վրա եւ այդ ամենը՝ ի շահ մեր պետականության հզորացման եւ զարգացման»:
ՀՀ ԳԱԱ Մ. Աբեղյանի անվան գրականության ինստիտուտի տնօրեն Հերիքնազ Որսկանյանն իր ելույթում ասաց. «Պարույր Սեւակն ի ցույց դրեց ստեղծագործող մարդուն բնորոշ հոգեկան վիճակները, արդարություն եւ ճշմարտություն որոնող անհատի մտատանջանքները: Սեւակի որոնածը լույս էր, լույս՝ դարերի համար, լույս՝ իր ազգի համար, լույս՝ մարդկության համար: Սեւակի որոնածը կյանքը հրաշք դարձնող զնգոցն էր բահի, պտղավորումը՝ այգու, փոշոտումը՝ արտի, սեղանի վրա դրված ցորենհացը՝ հունցված ազնիվ թթխմորով, անխարդախ գինին՝ մարդու սիրտը երգով լցնող: Սեւակը, անշուշտ, ոչ միայն գտել, այլեւ մեզ համար բանաձեւել էր այդ ամենը չկորցնելու ճանապարհը, այն է՝ կարողանալ մաքրվել, ինքնամաքրվել «այնպես, ինչպես օվկիանն է ինքն իրեն մաքրում»:
Գիտական զեկուցումներ լսվեցին մի շարք թեմաներով, մասնավորապես` «Պարույր Սեւակը եւ Աստվածաշունչը», «Պարույր Սեւակը մանկագիր», «Պարույր Սեւակը եւ հայ միջնադարյան գրականությունը», «Պարույր Սեւակի պոեզիան հայ կոմպոզիտորական արվեստում» եւ այլն: Պարույր Սեւակը հանդիսացավ 1960-ական թվականների հայ պոեզիայի լավագույն դեմքը:
Գիտաժողովը կազմակերպել էին ՀՀ ԳԱԱ Հայագիտության եւ հասարակական գիտությունների բաժանմունքը, ՀՀ ԳԱԱ Մանուկ Աբեղյանի անվան գրականության ինստիտուտը, Երեւանի պետական համալսարանը, Խաչատուր Աբովյանի անվան հայկական պետական մանկավարժական համալսարանը, Պարույր Սեւակի տուն-թանգարանը՝ Կրթության, գիտության, մշակույթի եւ սպորտի նախարարության աջակցությամբ:
ՍՏԵՓԱՆ ՊԱՊԻԿՅԱՆ
