«Ճակատագրի սեւ շունը»: Ընթերցումներ Մադրիդում եւ Բարսելոնայում

Հուշագրության բնագավառում Փեն/Ալբրանդ մրցանակի արժանացած անգլիագիր ամերիկահայ գրող Փիթեր Բալաքյանի «Ճակատագրի սեւ շունը» հատորն իր առաջին հրատարակությունից 25 տարի անց շարունակում է մնալ արդիական եւ տասնյակ հազարավոր օրինակներով թարգմանվել աշխարհի տարբեր լեզուներով: «Արմինյն Միրոր-Սփեքթեթյթր» շաբաթաթերթից տեղեկանում ենք, որ գերմաներեն, ֆրանսերեն, հոլանդերեն, հունարեն, թուրքերեն, հայերեն եւ այլ լեզուների թարգմանվելուց հետո, վերջերս թարգմանվել է նաեւ իսպաներենի: «El Perro Negro del Destino» հատորը լույս է ընծայել Մադրիդի Բերգ ինստիտուտի հրատարակչատունը: Այդ առթիվ Պուլիցերյան մրցանակի արժանացած հեղինակը ընթերցումների շրջագայության է հրավիրվել Մադրիդի եւ Բարսելոնայի իշխանությունների կողմից: Մայիսի 8-ին Բալաքյանը ելույթ է ունեցել Մադրիդի համալսարանում, իսկ մայիսի 10-ին քաղաքի կենտրոնական մսաում գտնվող հանրածանոթ «La Buena Vida-Cafe՛ del Libro» գրախանութում: Ապա Բարսելոնա մեկնելով հանդես է եկել տեղի համալսարանի իրավաբանական ֆակուլտետում:

Մադրիդում նրան հյուրընկալել են գրքի հրատարակիչ Խոակին Գոնսալես Իբանեսը եւ թարգմանիչ պրոֆ. Ռոսա Բաուտիստա Կորդերոն, իսկ Բարսելոնայում՝ պրոֆ. Ռոսաննա Ալիխան, որ դասավանդում է համալսարանի իրավաբանական ֆակուլտետում, եւ համայնքային ժրաջան ղեկավար, իրավաբան Էմմա Հակոբյանը: Իսպանիայի առաջատար թերթերից «Էլ Պաիսում» Անդրեա Ագիլարը մայիսի 14-ին ընդարձակ հոդված է հրապարակել Բալաքյանի ստեղծագործությունների եւ 20-րդ դարի պատմության վրա Հայոց ցեղասպանության թողած ազդեցության մասին:

Ավելացնենք, որ ըստ «Միրոր-Սփեքթեյթրի», հաջորդ տարի «Ճակատագրի սեւ շունը» թամիլերենի է թարգմանվելու Հնդկաստանում:

Նաեւ հավելենք, որ ի նշան Իսպանիայի կառավարության հանդեպ երախտագիտության՝ մայիսի 19-ին, կիրակի օրը, Մադրիդի Ալմուդենա մայր տաճարի առաջ տեղի է ունեցել հայկական խաչքարի օծում եւ տեղադրում ձեռամբ Խաժակ արք. Պարսամյանի եւ կարդինալ Խոսե Կոբո Կանոյի, եւ ի ներկայության Իսպանիայում ՀՀ դեսպան Սոս Ավետիսյանի, Մադրիդի քաղաքապետի տեղակալի եւ այլ պաշտոնական անձանց:

Ներկայիս հայերի թիվը Իսպանիայում հասնում է մինչեւ 40 հազարի: Հայկական ծխական համայնքներ կան Մադրիդում, Բարսելոնայում, Վալենսիայում, Ալիկանտեում, Առնեդոյում եւ Սեւիլում:

Պատրաստեց՝ ՀԱԿՈԲ ԾՈՒԼԻԿՅԱՆԸ