Մոսկվայում վերջերս մահացել է թատրոնի եւ կինոյի հայազգի դերասանուհի Ելենա Մուրատովան (ծնյալ Դովլաթբեկովա): Ծնվել էր 1932 թվականին, Թիֆլիսում: 1957-ին ավարտել է ՎԳԻԿ-ը (կուրսի ղեկավար՝ Յուլի Ռայզման): 1958 թվականից եղել է Մոսկվայի Կինոդերասանի ստուդիայի թատրոնի թատերախմբի անդամ: Խաղացել է «Խելահեղ օր կամ Ֆիգարոյի ամուսնությունը» (Մարսելին), «Ծուռ հայելիների թագավորությունը» (Տատիկ), «Ամպրոպ» (Կատերինա եւ Վարվառա) եւ այլ ներկայացումներում: 1955-1989 թթ. նկարահանվել է տասնյակ կինոնկարներում, հիմնականում՝ երկրորդական դերերով («Օլեկո Դունդիչ», «Նռնաքարե ապարանջանը», «Վիյ», «Հաջողության կեռմանը», «Ադամ եւ Հեւա», «Փոքրիկ ողբերգություններ» եւ այլն): 2004 թվականից մինչեւ կյանքի վերջը Ելենա Մուրատովան դասավանդել է Ժամանակակից արվեստի ինստիտուտում, եղել է թատերական արվեստի ամբիոնի պրոֆեսոր: Որոշ ժամանակ ամուսնացած է եղել թաթար դերասան Ռադներ Մուրատովի (1928-2004) հետ, որը հայտնի էր «Հաջողության ջենթլմենները» կինոնկարում Վասիլի Ալիբաբեւիչի դերով. այս ամուսնությունից ունեցել է Լեոնիդ որդուն՝ նույնպես դերասան:
Իսկ 1960 թվականին Ելենա Մուրատովան նկարահանվել էր «Հայֆիլմում»՝ Լաերտ Վաղարշյանի « Կոչված են ապրելու» շարժանկարում կատարելով Լյուբայի դերը:
Ա. Բ.
