Հունիսի 20-ին Գյումրիում մեկնարկել է դասական երաժշտության «ART շաբաթ» անվանյալ փառատոնը, որը քաղաքապետարանի մշակույթի եւ երիտասարդության հարցերի բաժնի նախաձեռնությամբ անցկացվում է երկրորդ անգամ։ Այն առաջին անգամ կազմակերպվել էր դեռ 2019 թվականին, սակայն անցած երկու տարիներին համավարակի պատճառով չէր կայացել։
Երկուշաբթիից երկուշաբթի անցկացվելիք ներկա ութօրյա փառատոնի հանդիսավոր բացումը տեղի ունեցավ Գյումրու տեխնոլոգիական կենտրոնի դահլիճում՝ Ա. Խաչատրյանի անվան հանրաճանաչ եռյակի գեղեցիկ կատարումներով, հնչեցին հայ դասականների հանրահայտ ստեղծագործություններ։ Հետագա օրերին քաղաքի համերգասրահներում, թանգարանների բակերում, այլ մշակութային օջախներում հանդես են գալու տեղի երաժշտական ու արվեստի դպրոցների, Կարա-Մուրզայի անվան պետական երաժշտական ուսումնարանի սաներն ու Երեւանի Կոմիտասի անվան կոնսերվատորիայի Գյումրու մասնաճյուղի երաժիշտ-կատարողները, նախատեսված է նաեւ կոմպոզիտոր, ջութակահար Երվանդ Երկանյանի հեղինակային համերգը։ Բոլոր միջոցառումների մուտքն ազատ է։
Այս փառատոնը մրցութային չէ, այլ կարեւոր դեր ունի հատկապես երիտասարդ սերնդի գեղագիտական դաստիարակության, դասական երաժշտության հանրայնացման առումով։ Այն նաեւ քաղաքի պատանի ու երիտասարդ կատարողներին մեծ լսարանի առջեւ հանդես գալու փորձառություն ձեռք բերելու հնարավորություն է ընձեռում։
Մնում է ափսոսալ, միայն, շնորհակալ գործի ծառայող այս փառատոնի մասամբ օտարալեզու անվան համար։ Գոնե մեզ համար հասկանալի չէ՝ ինչո՞ւ է Հայաստանում հայերի համար անցկացվող փառատոնը կոչվում «ART շաբաթ», ի դեպ՝ նաեւ լեզվի մասին ՀՀ օրենքի խախտմամբ…
Երգչախմբային արվեստի զարգացմանը նպաստելուն էր միտված համայնքային նույն կառույցի նախաձեռնությամբ քաղաքում հունիսի 15-ին անցկացված «Հայաստան» երգչախմբային մրցույթ-փառատոնը՝ Գյումրու եւ Շիրակի մարզի արվեստի ու երաժշտական դպրոցների 8 երգչախմբերի մասնակցությամբ։ Որպես պարտադիր ստեղծագործություն փառատոնի համար ընտրված էր կոմպոզիտոր Էդգար Գյանջումյանի «Պիտի ապրենք» երգը, որը գալա-համերգի ավարտին 200-ից ավելի պատանի մասնակիցները երգեցին հեղինակի նվագակցությամբ։
ԳԵՂԱՄ ՄԿՐՏՉՅԱՆ
Գյումրի
