«Գոյ» թատրոնի տնօրեն Արթուր Սահակյանը և անձնակազմը պատրաստվում են դատական կարգով վիճարկել կառավարության որոշումը, որով «Գոյ»-ը երեկվանից միացվեց Գ. Սունդուկյանի անվան ազգային ակադեմիական թատրոնին։
«Ամեն ինչ անում են՝ խանգարելու մեր աշխատանքը։ Մենք դատարանով պիտի ապացուցենք այս որոշման անօրինականությունը։ Այսօրվանից արդեն սկսում ենք այդ գործընթացը։ Համապատասխան հայց կկազմվի, որն էլ մուտք կարվի դատարան»,- Azg.am-ի թղթակցի հետ զրույցում ասաց Ա. Մազմանյանի անվան բեմարվեստի ազգային, փորձարարական «Գոյ» թատրոնի տնօրենը։
Արթուր Սահակյանը տեղեկացրեց, որ դատական գործընթացներին զուգահեռ՝ թատրոնի կոլեկտիվը շարունակելու է խաղալ ներկայացումներում, ստեղծագործական դադար չի հայտարարվելու՝ որքան էլ անկումային տրամադրությունների ֆոնին փորձերը և բուն ներկայացումները դերասաններին դժվար են տրվում։
«Ես համոզված եմ, որ սա քաղաքական որոշում է՝ Նժդեհի մասին մեր ներկայացման հետևանք։ Բայց այդ ներկայացումն այս ամիս էլ ունենք և անպայման խաղալու ենք։
Մինչ կառավարության այս որոշումը՝ ԿԳՄՍ նախարար Ժաննա Անդրեասյանը հանդիպել է մեր թատրոնի մի քանի դերասանի հետ, հավատացրել, որ հանգիստ աշխատենք, Սունդուկյանի անվան թատրոնի հետ միացման որոշում չի կայացվի, լրացուցիչ քննարկումներ կլինեն։ Բայց փոխարենը երեկ եղավ միացման որոշումը»,- ասաց մեր զրուցակիցը։
Հարցին՝ Գ. Սունդուկյանի անվան ազգային ակադեմիական թատրոնին միանալու արդյունքում «Գոյ» թատրոնի քանի՞ աշխատակից է գործազուրկ դառնալու, Արթուր Սահակյանը պատասխանեց՝ հստակ թիվ չի կարող ասել, միայն կարող է ենթադրել, որ «Գոյ»-ի անձնակազմի ներկայացուցիչներին փոքր առ փոքր դերեր չեն հանձնարարվելու, և մարդիկ ավտոմատ կերպով դուրս են մնալու ստեղծագործական պրոցեսներից։
«Եթե մեր մտքին նման բան լիներ, մենք վաղուց մեկ հարկ իջել, Սունդուկյանի թատրոնում էինք աշխատել, բայց կողմնորոշվել ենք. մենք ոչ մեկի կամքին ենթակա չենք։
Այս ընթացքում Սունդուկյանից ոչ մեկի չենք տեսել։ Իհարկե, այնտեղ բազմաթիվ ընկերներ ունենք, իսկ մնացածներն անհասկանալի դիրքորոշում են ցուցաբերում միացման գործընթացներին»,- ամփոփեց «Գոյ» թատրոնի տնօրեն։
Հիշեցնենք, որ Ա. Մազմանյանի անվան բեմարվեստի ազգային, փորձարարական «Գոյ» կենտրոնի և Սունդուկյանի թատրոնի միավորման մասին հայտնի էր դարձել այս տարվա մարտին։ Թատրոնի ստեղծագործական անձնակազմը նամակով դիմել էր ԿԳՄՍՆ և բացատրություն պահանջել։ Նախարարությունից խոստացել էին ամեն ջանք գործադրել, որպեսզի այդ նախագիծն իրականություն չդառնա։
