Նոր սերունդը գուցե հարկ եղածի չափ չիմանա Ալեքսանդր Սոլժենիցինին՝ հանճարեղ, խորաթափանց, հայրենասեր և ազատասեր ռուս գրող-հրապարակախոսին, Նոբելյան մրցանակակրին, որը նաև անկոտրում, պողպատյա քաջություն ու կամք ուներ։
Ռուսաստանի խորհրդային տիրակալները չէին սիրում նրան, նրա անզիջում ազգասիրությունը, աքսորում էին նրան, գրքերն արգելում, բանտարկում։
Եվ միայն մեկը՝ թեկուզև որոշակի դժկամությամբ, բայց ընդունեց նրա երկրորդ հայտնությունը, ներքաշվեց հեռակա զրույցների մեջ՝ կրոնի, պետության ,ազգի ճակատագրի վերաբերյալ։
Ինչ-որ իմաստով քաղաքական թատերաբեմում առաջին քայլերն անող Վլադիմիր Պուտինի համար մեծագույն խորհուրդներ բացահայտեց հենց Սոլժենիցինը։
Ռուսաստանի կործանման հստակ հեռանկարով իրականության մեջ նա միակ իմաստունն էր, որը կանխատեսել էր տասնամյակների ապագան, և նրա անսասան հեղինակության առջև խոնարհվեց նաև ժամանակակից աշխարհի հզոր առաջնորդներից մեկը։
Ինչո՞ւ եմ ընդգծում Սոլժենիցինի և Պուտինի համադրումը:
Որովհետև հիմա էլ Հայաստանում է ստեղծվել անորոշության ու բազմաթիվ հարցականներով ու տագնապներով իրավիճակ։
Այսօր հայ առաքելական սուրբ եկեղեցին իր զավակին է վստահել օրվա իշխանության հետ բանակցելու, հաղորդակցվելու դժվարագույն առաքելությունը։
Իշխանության ղեկավարն իր հերթին պետք է սթափվի, նեղճակատ կուսակցական ներքին համախմբման փոխարեն գնա համազգային համախմբման, գնա կոնկրետ զիջումների, թոթափի դավաճանության մեղադրանքը, խոսի ժողովրդի, նրա արդարամիտ զավակ Սրբազանի հետ, փորձի վեր կանգնել իր նկրտումներից, փորձի խմբագրել դրանք կամ արժանապատիվ հեռանալ, եթե ասելիք չունենա։
Աստված իր սուրբ կառույցի սպասավորներից լավագույնին իր կամքով ուղղորդել է, որպեսզի վերջապես Հայաստան աշխարհում վերջ տրվի երկպառակությանը և քաղաքական սոդոմին։
Եվ պատկերացրեք՝ դրա գինը լինելու է կամ կարող է լինել ընդամենը մեկ մարդու հրաժարականը։
Կարծում եմ՝ երկիրը ցնցումներից զերծ պահելու ճանապարհը կարող է էապես կարճանալ վարչապետի և Սրբազանի հանդիպման միջոցով։ Որպես միջնորդ՝ կարող են հանդես գալ բազմաթիվ իմաստուն, արժանավոր մարդիկ, որոնց դերը հանրության մեջ անուրանալի է։
Պետք է գիտակցենք, որ երկիրը ցնցումներից զերծ պահողները տարբեր գույնի թասակներով ելուզակները չեն. նրանց հանձնառությունը ողբերգական վերջաբան է ունենալու։
Հրայր Կամենդատյան, «Հայաքվե» նախաձեռնության ներկայացուցիչ
