Տարածաշրջանային հարցերով փորձագետ Նաիրի Հոխիկյանը գրել է.
Սյունիքի մարզում հոկտեմբերի 17-ին տեղի կունենա ՏԻՄ մի քանի կարևոր ընտրություն։ Մեղրիում, Տաթևում, Տեղում և Գորիսում կընտրվեն նոր ղեկավարներ։
Նշված համայնքներում իշխանությունը գործի դրեց բոլոր լծակները’ ազատվելու ընդդիմադիր համայնքներ ունեցող ղեկավարներից, որ տեղադրի իր մանկլավիկներին։ Այդ գործը հիմնականում կատարվեց Թուրքիայի օրինակով։ Այնտեղ էլ Մուշի, Կարսի, Դիարբեքիրի և այլ ընդդիմադիր քաղաքապետերին կալանավորում ու գործ էին կարում, հետո ղեկավար նշանակում Էրդողանի քիմքին հաճելի ճիճուներին։
Մեզանում էլ ՔՊ-ն օգտագործում է ճիշտ նույն էրդողանական աշխատաոճը։ Եվ հիմա, մինչ Թուրքիան իր ձեռքերն է շփում’ Նախիջևանից իր զորքը Սյունիք մտցնելու հեռանկարից, մեզանում փորձում են գլխատել հերոսական Սյունիքի ազգային ոգին, դարձնել անդեմ ու անգաղափար մի զանգված։
Ես գիտեմ, որ սյունեցին չի կարող կտրվել ազգայինից ու տուրք տալ ազգուրաց տականքներին, բայց պետք է ընտրության գնալիս հիշել, թե ով ով է, ով ինչ է բերել այս ազգին ու պետությանը և ինչպիսի մարդկային ու բարոյական կերպար ունի։ Հիմա մի քանի բառով ասեմ, թե ինչ կլինի, եթե քաղաքական իշխանությունը հաջողության հասնի Սյունիքում։ Կարճ ժամանակ անց բանտերից ազատ կարձակվեն ընդդիմադիր քաղաքապետերը։
Առուշ Առուշանյանի անմեղությունը կապացուցվի, բայց դե Գորիսն արդեն ուրիշ քաղաքապետ կունենա։ Տեղ համայնքում եթե իշխանությունը հաղթի, ապա մարզպետի քրոջ որդուն կապահովեն նոր հնարավորություններով։ Դրանց մասին սյունեցիները լավ գիտեն։ Փոխարենը պաշտոնից կզրկվի Սյունիքի մարզպետ Մելիքսեթ Պողոսյանը, քանի որ նա արդեն ծառայել է Նիկոլ Փաշինյանի նպատակների իրականացմանը և այլևս պետք չի։
Սյունիքի մարզպետի աթոռին կնստի երբեմնի հավատարիմ սերժական ոստիկան, հետո իշխանության փոխվելու հետ նույնքան արագ փոխված երդվյալ նիկոլական Արմեն Խաչատրյանը։ Այս մարդու անցած ճանապարհը և բարոյական կերպարը ոչ ոքի համար գաղտնիք չէ, բայց իշխանությունը սարեր է շուռ տալիս, ստիպում է հիշողություններ կորցնել։ Բա գիտեք սոցիալական աջակցության անվան տակ ծախսերը քիչ ազդեցիկ ե՞ն։
Եթե մի ժամանակ ընտրության գնալիս ասում էինք, որ 5000 դրամով ծախվելով, ընտրողը քանդում է իր տունը, ապա այսօր ծախված է իշխանությունը’ քանդելով ոչ միայն մեր տունը, այլև ամբողջ երկիրը։ Մենք ունենք հնարավորություն’ պահելու մեր հայրենիքը։
Կատարեք ճիշտ ընտրություն’ հանուն հայրենիքի, ոչ թե մի քանի հոգու։
