Մեկ տարի առաջ այս օրերին ՀՀ զինված ուժերը համառ մարտեր էին մղում Հայաստանի և Արցախի անվտանգության համար: Մինչ ռազմաճակատում առաջապահ ստորաբաժանումները կյանքի գնով մարտական խնդիր էին լուծում, Հայաստանի իշխանությունները պարտությունը քողարկելու հիմնավորումներ էին փնտրում, մեղավորներ նշանակում և կեղծ թիրախներ հնարում: Այս մասին ԱԺ-ում ելույթի ժամանակ ասաց «Պատիվ ունեմ» խմբակցության պատգամավոր Տիգրան Աբրահամյանը.
«Խնդիրը մեկն էր՝ ինչ էլ լիներ, պետք է հայտարարվեր, որ մեղավոր են բոլորը բացի մեկ մարդուց՝ Նիկոլ Փաշինյանից:
Պետական մեքենան գործի դնելու փոխարեն, իշխանությունը կազմաքանդում էր նույնիսկ խաղաղ պայմանների համար նախատեսված մեխանիզմները»,-ասաց պատգամավորը և շեշտեց, որ այն մարդիկ, որոնք պնդում են, թե այս պատերազմը կանխելու կամ կանգնեցնելու հնարավորություն չի եղել սխալմամբ կամ դիտմամբ մոլորեցնում են հանրությանը:
Տիգրան Աբրահամյանի պնդմամբ՝ 44-օրյա պատերազմի մեկնարկը տրվել էր դեռևս 2018թ-ին հեղափոխությունից հետո, իսկ հետագայում դրանք ավելի արագ փուլ մտան: Նրա խոսքով՝ պատերազմ սկսելուն նպաստեց նաև իշխանության ՝ ՀՀ ԶՈՒ հրամանատարության և ռազմական ներուժի գլխատման արշավը, երկրի առաջին դեմքերի մեկուսացումը հասարակության պառակտումը և ժողովրդին խաղաղության պատրաստելու քայլերը.
«Ադրբեջանում ռազմական գործողություններ սկսելու քաղաքական որոշման հիմքում Հայաստանում ստեղծված իրավիճակն էր, որի պայմաններում Ադրբեջանում եկան վերջնական եզրահանգման, որ ժամանակն է խնդիրը ռազմական ճանապարհով լուծելու»,-ասաց Աբրահամյանը:
Պատգամավորը նաև պնդեց, որ ՊՆ նախկին նախարար Դավիթ Տոնոյանի, ԶՈՒ ԳՇ նախկին պետ Օնիկ Գասպարյանի և ՊԲ նախկին հրամանատար Ջալալ Հարությունյանի անվտանգությունը պետք է ապահովվի, քանի որ վերջիններս շատ մանրամասներ կարող են հայտնել պատերազի պարտության հանգամանքների մասին .
«Իշխանությանը խանգարող մարդիկ դեռ ամբողջությամբ չեզոքացված չեն: ՊՆ նախկին նախարար Դավիթ Տոնոյանի, ԶՈՒ ԳՇ նախկին պետ Օնիկ Գասպարյանի և ՊԲ նախկին հրամանատար Ջալալ Հարությունյանի անվտանգությունը պետք է լիարժեքորեն ապահովվի: Վաղ թե ուշ իշխանությունը փոխվելու է , իսկ հասարակությունը պետք է հնարավորություն ունենա այս մարդկանցից լսելու այն իրականությունը, այն ինչուների պատասխանը, ինչն այս իշխանությունների օրոք բացառված է»,-ասաց Աբրահամյանը:
Աղբյուր` Փաստինֆո
