Քաղաքագետ Վահե Դավթյանի գրառումը, –
Փաստորեն՝ Երևանը դիմել է Բաքվին Հայաստան֊Վրաստան֊Ադրբեջան֊Ռուսաստան լոգիստիկայից օգտվելու համար։ Սա է՞ ձեր ապաշրջափակումը, հանուն որի կոտրեցիք պետության ողնաշարը։ Նոյեմբերյան կապիտուլյացիայից հետո գեթ մեկ անգամ չխոսեցիք Հայաստանի համար առավել նպատակահարմար երթուղու՝ Իջևան֊Ղազախի մասին։
Դրա փոխարեն առաջ էիք տանում “Նախիջևանով Ռուսաստան” անհեթեթ թեզը։ Բայց առավելագույնը, ինչին կարողացաք հավակնել, Վրաստանով Ռուսաստանի հետ կապ հաստատելն է, ինչն առանց այդ էլ իրականացվում էր ծովային ու ավտոմոբիլային երթուղիներով։
Հիմա էլ թէ՝ Ադրբեջանը ճանապարհ չի տրամադրում Հայաստանին։ Իսկ ինչու՞ պետք է տրամադրի։
Լավ, ինչքա՞ն կարելի է անտեսել աշխարհաքաղաքականության բազային օրենքները:
Եթե դեռ չեք հասկացել, թե ինչ է տեղի ունենում, ապա տեղեկացնեմ, որ մենք խայտառակ կերպով պարտվում ենք հիբրիդային պատերազմի բոլոր ճակատներում։ Թշնամու առանցքային խնդիրն է Հայաստանի հաղորդակցային ու տնտեսական պարալիզացումը, բացարձակ սնանկացումն ու, որպես արդյունք, սուբյեկտության վերացումը:
Ուստի Հայաստանի տրանսպորտային բլոկադան դեռ շարունակվելու է: Մի բան էլ խորանալու է։
Ձգեք գոտիները։
