«Ֆրանսիայի նախագահ Էմանուել Մակրոնի` Մարսելում կանխակալ, միակողմանի և իրականությունից հեռու հայտարարությունները, որոնք շրջանառվում են այս երկրի հայկական լոբբիի կողմից, որի հետ հետ նա հանդիպել է, վկայում են Ղարաբաղում անջատողականությանը նրա ակտիվ աջակցության մասին»,- EU Reporter-ում գրել է վերլուծաբան Ջեյմս Ուիլսոնը։
Ըստ հոդվածագրի՝ բողոքի ցույցերից ցնցված իր երկրում կարգուկանոնը վերականգնելու փոխարեն, Մակրոնը զբաղված է քաղաքական խաղերով, որոնք կարող են «հրկիզել» Հարավային Կովկասի տարածաշրջանը, որը էներգետիկ ռեսուրսների աղբյուր է ամբողջ Եվրամիության համար։
Ուշադրություն դարձրեք եվրոպացի լրագրողի ձևակերպմանը՝ «Հարավային Կովկսան ամբողջ Եվրամիության համար էներգետիկ ռեսուրսների աղբյուր է». այսինքն՝ թքած, թե գերտերությունների շահերի բախումից այստեղ հայեր, հայերի հայրենիք Արցախ ու Հայաստան է ոտնակոխ արվում։ Պետք է զգույշ ու հաշվենկատ լինել, Ադրբեջանի հասցեին ոչ մի թթու խոսք չասել, անգամ եթե այդ երկիրն ու նրա բռնապետը պատերազմական հանցագործ են, ցեղասպան ու պատրաստվում են հոշոտել Արցախն ու Հայաստանը։ Եթե կա համաեվրոպական տնտեսական շահ՝ էներգետիկ աղբյուրները գալիս են ագրեսոր Ադրբեջանից, միևնույն է, պետք է լռել հանուն տնտեսական այդ շահի։
Հարավային Կովկասը փոքր տարածք է, բայց այստեղ բախվում են մի քանի գերտերությունների շահեր։ ԵՄ-ն և ԱՄՆ-ը, որոնք հանդես են գալիս որպես խաղաղ համաձայնագրի միջնորդներ, շահագրգռված են Բաքվի և Երևանի միջև հարաբերությունների կարգավորմամբ։
«Միևնույն ժամանակ Մակրոնին չի հուզում, որ Եվրոպայի մնացած հատվածը Ղարաբաղի անջատողականության կողմնակից չէ։ Ֆրանսիայի նախագահը ակնհայտորեն դեմ է Հարավային Կովկասում իրավիճակի խաղաղ լուծմանը »,-գրել է Ուիլսոնը։
Այնուհետև հոդվածագիրը մի ուրիշ քար է շպրտում Մակրոնի ուղղությամբ, թե նրա վարքագիծը հակասում է ԵՄ-ի պաշտոնական քաղաքականությանը, ինչի պատճառն այն է, որ Ֆրանսիան չի ցանկանում, որ Ուկրաինան հաղթի։
Մեկ այլ լրատվամիջոց էլ է վերլուծել Մակրոնի հայանպաստ հայտարարությունը։
«Փարիզը ձգտում է ռուսների հետ քաղաքական կոալիցիայի՝ Կովկասում իր ազդեցությունն ամրապնդելու համար»,- նշում է «Ցենզորը»՝ Ուկրաինայի խոշորագույն առցանց հրատարակություններից մեկը։
«Ֆրանսիայում ազդեցիկ ուժերը իրենց ուշադրությունը տեղափոխում են Ադրբեջան»,- ընդգծում է ուկրաինական Fakty.ua առցանց հրատարակությունը։
EU Reporte-ի հոդվածագիրը նաև կարծում է, որ հակառակ Ադրբեջանի և Հայաստանի միջև խաղաղ բանակցությունները խթանելուն՝ Մակրոնի գործողությունները միայն վնասում են այս գործընթացին, ինչը հակասում է ԵՄ-ի և Վաշինգտոնի տեսլականին։
«Մակրոնը Հարավային Կովկասում վարում է այնպիսի քաղաքականություն, որը հակասում է խաղաղության հասնելու Վաշինգտոնի ու Բրյուսելի ջանքերին»,- գրում է հեղինակը՝ վկայակոչելով Actualno-ի բուլղարական հրատարակության հրապարակումը։
Վերլուծաբանը վկայակոչում է իսրայելական i24 առցանց հեռուստատեսությանը, որը նշել է, թե նախագահ Էմանուել Մակրոնն ինքն է եղել Հայաստան զենք ուղարկելու՝ Փարիզի ռազմաքաղաքական որոշման հիմնական ջատագովը։
Ուիլսոնը կոչ է արել. «Եթե ԵՄ-ն ցանկանում է պաշտպանել իր էներգետիկ անվտանգությունը, պետք է կասեցնի Մակրոնի հակաեվրոպական գործունեությունը, որը ձեռնտու է Ռուսաստանին»։
Ուշադրություն դարձրեք, որ եվրոպացի լրագրողը վկայակոչում է իսրայելական, ուկրաինական ու բուլղարական լրատավմիջոցներին, որոնք երբեք աչքի չեն ընկել հայանպաստ ու հայապաշտպան դիրքորոշմամբ։
Իսկ վերլուծաբան Ջեյմս Ուիլսոնի՝ EU Reporter-ում հրատարակած այս հոդվածը խանդավառությամբ են տարածում հատկապես ադրբեջանական զլմները։
Նաիր Յան
