Սեպտեմբերի 13-ին Եվրոպական խորհրդարանն ընդունեց Թուրքիայի վերաբերյալ 2022 թվականի զեկույցը: Այդ մասին տեղեկացնում է «Turktime.net» կայքը:
Հայկական լրատվամիջոցները, «Factor.am»-ի գլխավորությամբ, զեկույցին անդրադարձել են Հայաստանի և Թուրքիայի միջև հարաբերությունների կարգավորմանը ԵԽ-ի ցուցաբերած աջակցության տեսանկյունից՝ բևեռելով իրենց ուշադրությունը թուրքական պետությանն ուղղված՝ Հայոց ցեղասպանությունը ճանաչելու և հայկական մշակութային ժառանգությունը պաշտպանելու հարցում իր պարտավորությունները կատարելու կոչերի վրա:
Որքան էլ դա միանգամայն տրամաբանական լինի, այդ զեկույցը, կասկածի տակ դնելով Եվրոպական միությանը Թուրքիայի անդամակցությունը, բուռն հակազդեցություն է առաջ բերել Անկարայում:
Ըստ թուրքական կայքէջի՝ զեկույցը պատրաստել է Թուրքիայի հարցերով Եվրախորհրդարանի մշտական զեկուցող, իսպանացի սոցիալ-դեմոկրատական պատգամավոր Նաչո Սանչեզ Ամորը:
Խորհրդարանի լիագումար նիստում զեկույցն ընդունվել է ձայների 434/152 հարաբերակցությամբ, ստեղխված իրավիճակում անհնար է համարվում ԵՄ-ին Թուրքիայի անդամակցության գործընթացի ծավալումը:
Միաժանակ պահանջվում է, որ Անկարան անհապաղ հավանություն տա ՆԱՏՕ-ին Շվեդիայի անդամակցությանը՝ պատճառաբանելով, թե դա որևէ առնչություն չունի ԵՄ-ին Թուրքիայի անդամակցության հետ: Ի դեպ՝ ԵՄ-Թուրքիա բանակցությունները սկսվել էին դեռևս 2005թ. սկզբներին:
Թեև զեկույցը գոհունակւթյամբ է արձանագրել Ուկրաինայի տարածքային ամբողջականությունը պաշտպանելու՝ Թուրքիայի մոտեցումը, բայցևայնպես, ափսոսանքով է նշել, որ թուրքական պետությունը հրաժարվում է աջակցել Ռուսաստանի դեմ միջազգայնորեն կիրառվող պատժամիջոցներին:
Գալով Թուրքիայի արտգործնախարության՝ նույն օրվա հակազդեցությանը՝ ապա նախարարությունը, տարածած հաղորդագրության մեջ որակելով զեկուցագիրը կանխակալ, հանիրավի, ապատեղեկատվության վրա հիմնված փաստաթուղթ, Եվրախորհրդարանի պատգամավորներին անվանում է պոպուլիստ քաղաքական գործիչներ, որոնք, ըստ հաղորդագրության, «ի վիճակի չեն մշակել և՛ ԵՄ-ի, և՛ տարածաշրջանի համար ապագային միտված ռազմավարական ճշգրիտ, մասնագիտական» մոտեցումներ:
Հարկ է նաև նշել, որ վերոհիշյալ կոչերը թուրքական կայքէջի հետ, շատ նախանձելի ողջախոհությամբ շրջանցել է նաև Թուրքիայի արտգործնախարարությունը:
Հակոբ Չաքրյան
