Մեդիա փորձագետ Տիգրան Քոչարյանը պնդում է՝ Արմեն Գրիգորյանի նկատմամբ իրականացվեց պետության կողմից հովանավորված հետապնդում: Մեկնարկն էլ տվեց Շիրակի մարզպետ Նազելի Բաղդասարյանը՝ հող նախապատրաստելով այս հետապնդման համար:
«Ի թիվս այլ պաշտոնյաների՝ դատավորի, դատախազի, քննիչի, քո ձեռքերն էլ են թաթախված այս ամեն ինչի մեջ, եւ ուշ թե շուտ, դու էլ պատասխան կտաս եւ կպատմես՝ ով էր քեզ տվել Արմեն Գրիգորյանի հետապնդումը կազմակերպելու պատվերը»,- Շիրակի մարզպետին է դիմում Տիգրան Քոչարյանը:
Արմեն Գրիգորյանին բերման ենթարկելու կադրերը, կալանավայրում նրան տեսակցություններից զրկելու որոշումը Տիգրան Քոչարյանի մոտ տպավորություն են ստեղծում, թե այս իշխանությունը վրեժխնդրությամբ է լցված Արմեն Գրիգորյան կերպարի, նրա մտքերի, գործունեության ու շրջապատի հանդեպ:
«Մենք տեսանք սպանություն ուղիղ եթերում, տեսանք՝ ինչպես մարդը սպանվեց պետական համակարգի կողմից, եւ դրա տակից որեւէ մեկը դուրս գալ չի կարող: Պետք է պատասխան տան նաեւ այն մարդիկ, ովքեր չեն ապահովել բժշկական օգնությունը նիստերի դահլիճում: Սա այն դեպքն է, երբ պետությունն արդարանալու որեւէ տարբերակ չունի»:
Տիգրան Քոչարյանը հիշում է նաեւ հրճվանքը, որը մերձիշխանական իրական ու ֆեյք կերպարները չկարողացան թաքցնել:
«Դուք շատ վատ, ապուշ եւ հիմար վիճակի մեջ հայտնվեցիք, որովհետեւ Արմենն իր խոսքերի տերը եղավ, իր մահով հաստատեց, որ ինքը ճիշտ է, դուք՝ սխալ: Դուք միշտ ապրելու եք թերարժեքության բարդույթով, որ այն, ինչ Արմենը ասել է ձեր մասին, ճիշտ է: Իսկ Արմեն Գրիգորյանը որոշեց այլեւս բանտ չվերադառնալ: Արմենն ու ազատությունը հոմանիշներ էին, փորձեցիք կոտրել, չստացվեց, սպանեցիք, բայց չկոտրեցիք»:
