Գրիչի փոխարեն՝ բահ, գրքի փոխարեն՝ տիղմ. ո՞ւր են փրկարարները
Աղետի գոտու վերածված Լոռու եւ Տավուշի մարզերում հետեւանքները վերացնելու առաջնագծում կամավորներ են: «Ազգ»-ի տեղեկություններով՝ Ալավերդի խոշորացված համայնքում այս պահին աշխատում են Հայաստանի՝ ընդամենը 3 մարզի փրկարարներ: Դեբեդի հեղեման հետեւանքները վերացնելու աշխատանքներում ինչո՞ւ ներգրավված չեն փրկարար ծառայության բոլոր մարզերի աշխատակիցները: Պատկան մարմինները խուսափում են հարցին պատասխան տալ:
Արտակարգ իրավիճակների բոլոր՝ միջազգային ու տեղական, ուղեցույցներում եւ ռազմավարական պլաններում սեւը սպիտակի վրա գրված է, որ աղետի գոտում առաջնահերթ պետք է ներգրավվեն փրկարարները, այնուհետ՝ ուժային մյուս կառույցների ներկայացուցիչները՝ ոստիկանները, զինվորականներն ու այլք:
Եթե վերոնշյալ կառույցների ուժերը չեն բավարարում, պետությունը կարող է ներգրավել հարակից բնակավայրերի համայնքային աշխատողներին, ապա նոր միայն դիմել ուսանողներին ու մյուսներին:
Հայաստանի կառավարությունը, փաստացի, սկսել է վերջից, այսինքն՝ գործը թարս կողմով է առաջ տանում:
Հատկապես քննական այս շրջանում ուսանողին ասել, թե գրիչը թող, գնա բահ բռնի, մեղմ ասած՝ ոչ կոմպետենտություն է: Առավել տարակուսելի է, երբ նման բան հորդորում է կրության համար պատասխանատու թիվ մեկ պաշտոնյան՝ ԿԳՄՍ նախարարը:
Կամավորությունը հրաշալի բան է, բայց ոգեւորիչ գրառում կատարող տիկին Անդրեասյանը պատկերացնո՞ւմ է, հաշվարկե՞լ է՝ ուր է ուղարկում ուսանողին, ինչի՞ց է զրկում եւ ի՞նչ վտանգի մեջ կարող է ընկնել գրքից կտրվող երիտասարդը:
Եթե ոստիկանների, զինվորականների, եւ, առաջին հերթին, փրկարարների ուժերը չբավականեցնեն աղետի գոտու հարցերը լուծելու համար, Լոռի եւ Տավուշ կնետվենք բոլորս: բայց այդ ամենը թողնել ուսանողի ուսերին, սխալ է, այն էլ՝ մեծ:
Աշխարհի մեկ այլ երկրում չի կարող հանդիպել, որ փրկարարի փոխարեն ուսանողին տիղմ մաքրել տան, այն էլ՝ առանց վարձատրության:
Կտրվել է Հայաստանն աշխարհին կապող մի երակ եւս. պետք է յոթ չափել, մեկ կտրել
Վարարած Դեբեդը կանգնեցրել է նաեւ երկաթուղու աշխատանքը: «Ազգ»-ի տեղեկություններով՝ գիժ Դեբեդը քշել-տարել է ավելի քան 2.5 կմ երկաթգիծ: Ինչպե՞ս եւ ի՞նչ ժամկետներում կվերականգնվի երկաթուղու աշխատանքը. հարցը նախօրեին քննարկվել է ԵՏՄ խորհրդի նիստում:
«Ռուսական երկաթուղիներ» ընկերությունից հավաստիացրել են, որ հնարավոր ամենասեղմ ժամկետներում կվերականգնեն երկաթուղու՝ ջրասույզ եղած կամ վնասված հատվածները:
Տարածքային կառավարման եւ ենթակառուցվածքների նախարար Գնել Սանոսյանի խոսքով՝ մինչեւ երկաթգծերի ամբողջական վերանորոգումը կամ տեղադրումը, միջանկյալ լուծում է գտնվել:
«Այրում կայարանից դեպի Ալավերդի բավականին ժամանակ կպահանջվի վերականգնելու համար: Երկաթգծով բեռները կտեղափոխենք մինչեւ Այրում կայարան: Այդ հատվածում կա մի կամուրջ, որը նախկինում ծառայել է պահածոների գործարանին, ապահովել է մատակարարումը: Այն երկար ժամանակ չի աշխատում: Այդ երկաթգծային կամուրջը հիմա մենք վերափոխում-դարձնում ենք ավտոմոբիլային կամուրջ, ինչի վրայով կարող են բեռնատարներ անցնել»,- ասում է նախարարը:
Այսինքն՝ Հայաստան մտնող գնացքները կհասնեն մինչեւ Այրում կայարան, այնուհետեւ՝ վերոնշյալ կամրջով կկապվեն Մ6 մայրուղուն:
«Ազգ»-ի տեղեկություններով, պահածոների գործարանի՝ երկաթգծային կամուրջը չի շահագործվել տարիներ ի վեր՝ մոտ 30 տարի: Եվ, բնականաբար, խիստ անհրաժեշտ է, որ այն անցի համալիր ուսումնասիրություն: Տարիների ընթացքում, ենթադրաբար, մաշվել, կորոզիայի ենթարկվել ու շարքից դուրս է եկել թե՛ երկաթը, թե՛ բետոնը: Եվ մինչեւ համալիր ու մանրազնին ուսումնասիրություն, այնուհետեւ՝ փարձագիտական եզրակացություն չլինի, դա շահագործել պարզապես չի կարելի:
Կամրջակը՝ արտաքին աշխարհին կապող կածան
Ախթալա քաղաքը եւ հարակից 6 բնակավայրերը արտաքին աշխարհին կապել են երկաթե կոնստրուկցիաներով զոդած կամրջակով: Պատկան մարմինները դա համարում են «համայնքները շրջափակումից դուրս բերել»: Տեղանքին եւ աղետի ծավալներին անծանոթ մարդկանց կարող է թվալ, թե կառավարությունը, քափ-քրտինք կտրած, 5 օրում կամուրջ ու ճանապարհ գցել: Խոսքը իրար կցմցած երկաթների մասին է՝ հետիոտնային կամրջի, որով հնարավոր է հաց, ջուր եւ առաջին անհրաժեշտության այլ ապրանքներ հասցնել: Ինչն արվում էր նաեւ անտառամիջյան ճանապարհով՝ «Ուրալ»-ի միջոցով:
Որեւէ մեկը, անխոս, չի էլ ակնկալում, թե մի քանի օրում հնարավոր էր կամուրջ գցել (այլ երկրներում իհարկե հնարավոր է, տարբերակները շատ են), բայցեւ գոնե էթիկապես տգեղ է կամրջակի տեղադրումը հավասարեցնել ապաշրջափակմանը:
Պատկան մարմինները, լավ կլինի, շատ գործ անեն՝ քիչ լուսանկարվեն ու իրավիճակը ներկայացնեն ըստ էության:
ՍԵՎԱԿ ՎԱՐԴՈՒՄՅԱՆ
