Փաշինյանն իր հայտարարությունների պատասխանատվությունը փորձում է նաեւ Արցախ տեղափոխել

Հայաստանի վարչապետ Նիկոլ Փաշինյանը վստահեցնում է, որ 2018 թվականից Լեռնային Ղարաբաղի հակամարտության կարգավորմանն ուղղված բանակցային գործընթացում իր արտահայտած որեւէ նախադասություն չկա, ինչին Արցախի իշխանություններն, ի դեմս նախագահի ու անվտանգության խորհրդի նախագահի, տեղյակ չլինեն:

«ԼՂ նախագահի հետ այս ընթացքում մենք տասնյակ հանդիպումներ ենք ունեցել եւ ունենում, ամեն ինչ չէ, որ լուսաբանում ենք: Ուզում եմ մի շատ կարեւոր արձանագրում անել` 2018 թ.-ից որեւէ բանակցության մեջ իմ արտասանած որեւէ նախադասություն չկա, որից ԼՂ իշխանությունը տեղյակ չէ: Սրանում չափազանցություն չկա: Բանակցությունների պրոցեսում իմ արտաբերած որեւէ նախադասություն չկա, որից ԼՂ իշխանությունը տեղյակ չէ»,- Հանրային հեռուստընկերությանը տված հարցազրույցի ժամանակ ասել է Փաշինյանն ու շտապել ավելացնել, որ իր եւ Արայիկ Հարությունյանի հանդիպման մանրամասներն Արցախի նախագահն էլ իր հերթին դետալային կերպով իր կաբինետին է ներկայացնում: Հետեւաբար, շարունակում է, պաշտոնական Ստեփանակերտը, ի դեմս կարեւորագույն պաշտոն զբաղեցնողների, քաջատեղյակ են Փաշինյանի թե՛ խոսքերից, թե՛ քայլերից:

Արցախի Ազգային ժողովի «Արդարություն» խմբակցության պատգամավոր Մետաքսե Հակոբյանը, որ Արցախի Անվտանգության խորհրդի քարտուղար Վիտալի Բալասանյանի թիմակիցն է (Բալասանյանն Արցախի «Արադարություն» կուսակցության առաջնորդն է), «Ազգ»ի հետ զրույցում վստահեցնում է՝ որեւէ մեկը չի կարող պնդել, որ Հայաստանի Հանրապետության վարչապետ Նիկոլ Փաշինյանն Արցախի հետ կապված եւ ամեն մի հարց ներկայացնում է Արցախի նախագահին ու Անվտանգության խորհրդի քարտուղարին: «Վստահ չեմ, որ Փաշինյանն ասում է այն ամենն, ինչ կա իրականում: Մենք ավելի շատ հակված ենք այն մտքին, որ ՀՀ վարչապետն ասում է այն, ինչն ինքն է ուզում ասել, կամ ներկայացնում է այնքանով, որքանով հարմար է գտնում ասել: Ու վստահ եմ, որ ճշմարտությունը չի ներկայացնում այնպես, ինչպես կա: Ավելին՝ Արցախում տեղյակ չեն՝ բանակցային սեղանին ինչ կա կամ ինչ է պատրաստվում բանակցել Փաշինյանը»,- շեշտում է նա:

Ենթադրել կարելի է, որ վարչապետ Փաշինյանն Արցախի հետ կապված մի շարք աղմկահարույց հայտարարություններ է հեղինակել, այժմ ցանկանում է դրանց պատասխանատվությունը նաեւ Արցախի պաշտոնյաների վրա գցել:

ՍԵՎԱԿ ՎԱՐԴՈՒՄՅԱՆ