«Բրիլ» հրատարակչությունը վերջերս լույս է ընծայել «Հայերեն բնագրեր եւ ուսումնասիրություններ» մատենաշարի 7-րդ հատորը՝ «Հայաստանը եւ Բյուզանդիան առանց սահմանների. շարժունակություն, փոխազդեցություն, պատասխաններ» վերտառությամբ (խմբագիրներ՝ Էմիլիո Բոնֆիլիո, Կլաուդիա Ռապ): «Ժամանակի ընթացքում Բյուզանդիան ավելի ու ավելի է ճանաչվում որպես հարեւան տարածաշրջանների, քաղաքական միավորների եւ ժողովուրդների հետ երկխոսության կենսունակ մշակույթ: Որտե՞ղ է հնարավոր փնտրել նման դինամիզմ, քան բյուզանդացիների եւ հայերի փոխազդեցության մեջ: Պատերազմն ու դիվանագիտությունն այդ պատմության միայն մի մասն են: Առավել տեւական մասը բաղկացած է շփումից եւ փոխադարձ ազդեցությունից, որը միջնորդվում է անհատների կողմից, որոնք տիրապետում էին ինչպես մշակույթներին, այնպես էլ լեզուներին»,- կարդում ենք գրքի ծանուցման մեջ:
Հատորում ընդգրկված են տարբեր սերունդների բազմազգ գիտնականների նոր աշխատություններ, որոնք ներկայացնում են գրականության, նյութական մշակույթի եւ կրոնի ոլորտներում հայ-բյուզանդական փոխգործակցության զանազան ձեւեր: Հոդվածների հեղինակներն են Գերթ Բորսեման, Էմիլիո Բոնֆիլիոն, Բեռնար Քուլին, Կարեն Համադան, Ռոբին Մեյերը, Յոհաննես Փրայզեր-Կապելլերը, Կլաուդիա Ռապը, Մարկ Ռուզիենը, Վեռներ Զայբթը, Էմանուել վան Էլվերդինգեն, Թեո Մարթեն վան Լինթը, Ալեքսանդրա-Կիրիակի Վասիլիու-Զայբթը եւ Դավիթ Զաքարյանը:
Էմիլիո Բոնֆիլիոն (ծնված 1980-ին, Պալերմոյում, Սիցիլիա) 2011-ին արեւելագիտության թեկնածուի կոչում է ստացել Օքսֆորդի համալսարանում: Համբուրգի համալսարանի գիտաշխատող է եւ Հայագիտության միջազգային ընկերակցության ղեկավար հանձնախմբի անդամ: Հետազոտությունները վերաբերում են քրիստոնեության պատմությանը Արեւելյան Միջերկրածովյան շրջանում, Կովկասում եւ Բյուզանդիայում ուշ անտիկ եւ միջնադարյան ժամանակաշրջաններում, հայագիտությանը, ինչպես նաեւ Բյուզանդիայում եւ քրիստոնյա Արեւելքում Հովհան Ոսկեբերանի երկերի խմբագրություններին եւ ընդունելությանը:
Կլաուդիա Ռապը (ծնված 1961-ին) գերմանացի բյուզանդագետ է, Վիեննայի համալսարանի բյուզանդագիտության պրոֆեսոր եւ Ավստրիայի գիտությունների ակադեմիայի միջնադարյան հետազոտությունների ինստիտուտի տնօրեն: Ղեկավարել է մի շարք միջազգային հետազոտական նախագծեր եւ հրատարակել է ուսումնասիրություններ ուշ անտիկ դարաշրջանի եւ Բյուզանդական կայսրության մշակութային, սոցիալական եւ կրոնական պատմության վերաբերյալ:
Ա. Բ.
