Իրանի ԱԳ նխարար Ամիր-Աբդոլլահիանը հունվարի 24-ին Ուզբեկստանի մայրաքաղաք Տաշքենդում Տնտեսական համագործակցության կազմակերպության՝ ԷԿՕ-ի արտաքին գործերի նախարարների 26-րդ վեհաժողովի շրջանակներում հանդիպել է Ադրբեջանի իր գործընկերոջ՝ Բայրամովի հետ: Ըստ հաղորդագրությունների, նախարարները քննարկել են երկկողմ բարեկամական հարաբերությունների ընդլայնման ուղիները: Նախարար Ամիր-Աբդոլլահիանը հարկ է համարել անդրադառնալու Իրանի արտաքին քաղաքականության առաջնահերթություններին եւ, որպես սահմանակից երկիր, կարեւորելու Ադրբեջանի դերն Իրանի արտաքին քաղաքականության մեջ, ինչպես նաեւ կրկնել ԻԻՀ պաշտոնական տեսակետն Ադրբեջանի «ազատագրված» տարածքների ու տարածաշրջանում կայունության հաստատման ու ինտեգրացիոն գործընթացների համար նոր հնարավորությունների մասին:
Նախարար Բայրամովն էլ կարեւորել է բեռնափոխադրումների ոլորտում Իրան, Ադրբեջան, Ռուսաստան եռակողմ ձեւաչափը, այն գնահատելով որպես տարածաշրջանային համագործակցության զարգացման միջոց:
Ըստ պաշտոնական հաղորդագրությունների, Իրանի ու Ադրբեջանի արտաքին գործերի նախարարները քննարկել են նաեւ տարածաշրջանային խնդիրների կարգավորման հարցում 3+3 ձեւաչափի հնարավորությունները՝ արտատարածաշրջանային խաղացողների միջամտությունը կանխելու համար:
Սակայն պաշտոնական հաղորդագրություններից հնարավոր չէր պատկերացում կազմել, թե արդյո՞ք ԻԻՀ ԱԳ նախարարն այս հանդիպմանը նույնպես իր գործընկերոջը հիշեցրել է Իրանի «կարմիր գծերի» մասին, եւ արդյո՞ք քննարկվել է Լաչինի միջանցքի ապաշրջափակման անհրաժեշտության հարցը:
ԳՐԻԳՈՐ ԱՌԱՔԵԼՅԱՆ
Իրանագետ
