Բրյուսելը շփոթված եւ հակասական կերպով արձագանքեց Իսրայելում տեղի ունեցած ահաբեկչությանը, գրում է չեխական «իԴՆԵՍ» («iDNES») պարբերականը: ԵՄ-ն մեկ ձայնով չի խոսում, եւ աշխարհին չի հետաքրքրում՝ ինչ է մտածում Եվրոպան, քանի որ վերջինս քաղաքականապես անկարող է դուրս եկել ու չի կարողացել լուծել ոչ մի հակամարտություն, ասվում է հրապարակման մեջ: Այդ առումով թվարկվում են նաեւ Լեռնային Ղարաբաղը, Մալին, Կոսովոն, ներգաղթյալների հոսքի խնդիրը միջեկրածովյան շրջանում:
Բոլոր նման դեպքերում, ըստ հրապարակման, եվրոպացի դիվանագետները միջնորդի դեր են ստանձնել բանակցություններում, սակայն դա ավարտվել է նրանով, ինչ «Պոլիտիկո» կայքն անվանում է «եվրոպական իմպոտենցիա»:
Նշվում է, որ դա հատկապես ցայտուն ցույց տվեց Ղարաբաղի հետ կապված հայ-ադրբեջանական վեճը: Եվրոմիության քաղաքականությունն այնտեղ ամբողջովին անատամ էր: Հուլիսին Եվրոպական խորհրդի նախագահ Շառլ Միշելը հյուրընկալեց Բաքվի եւ Երեւանի ներկայացուցիչներին ու լավատեսորեն խոսեց տեղի ունեցած զրույցի մասին՝ այն կոչելով «անկեղծ եւ ազնիվ»: Բայց երբ շուտով ադրբեջանցիները բռնի ուժով գրավեցին «վիճելի տարածաշրջանը», Եվրոպան լռեց կամ ճգնաժամի համար մեղադրեց Մոսկվային: Բրյուսելը չհամարձակվեց կշտամբել Ադրբեջանին՝ իր «պալատական» գազ մատակարարողին:
Ամերիկյան «Թայմ» հանդեսում տպագրված նման մի քննադատություն, որի հեղինակը Հարվարդի համալսարանի պրոֆեսոր Քրիստինա Մարանցին է, ներկայացված է ռուս-հայկական «Երկրամաս» լրատվական գործակալության կայքէջում: «Արցախում հազարամյակների հայկական կյանքի վերացումը,- գրել է պրոֆեսորը,- հնարավոր է դարձել այն մարդկանց անգործության ու թվացյալ անտարբերության շնորհիվ, որոնք կարող էին դա կանխել: Միացյալ Նահանգները եւ Եվրոմիությունը բարձրաձայնում են մարդու իրավունքների մասին բոլորի համար, բայց ոչինչ չարեցին ինը ամիս, մինչ Արցախի ժողովուրդը զրկված էր սննդից, դեղորայքից, վառելիքից եւ այլ կենսական անհրաժեշտություններից: Նրանք ոչինչ չեն արել՝ կատարելու Միջազգային դատարանի որոշումը, որը Ադրբեջանից պահանջում էր դադարեցնել շրջափակումը դեռ 2023 թվականի փետրվարին: Այս անգործությունը ակնհայտորեն խրախուսեց Ադրբեջանին հարձակվել, ինչպես որ կխրախուսեր մյուսներին նույնն անել այլ վայրերում»:
Գ. ՄԿՐՏՉՅԱՆ
