Սեպտեմբերի 21-ին Մայնի Ֆրանկֆուրտի Գյոթե համալսարանում մեկնարկային ձեռնարկով սկսվեց նույն ամսին հիմնադրված Գերմանահայ ուսանողների միության՝ «Միասին»-ի գործունեությունը: Միության առաջնահերթ նպատակն է Գերմանիայի քաղաքական խոսույթը հարստացնել՝ գերմանահայ ուսանողների ձայնը ներառելով:
Մայնի Ֆրանֆուրտի քաղաքապետ դոկտ. Նարգեսս Էսքանդարի-Գրյունբերգը ողջունելով գերմանահայ ուսանողների միության անդամներին՝ կարեւորեց «Միասին» լինելու որոշումը: Գերմանիայում աջ ուժերի վերելքի պայմաններում ընդգծված անհրաժեշտություն է այն, որ Հայ ուսանողական միության անդամները համագործակցում են այլ փոքրամասնությունների՝ ալեւիների, հրեաների (եւ այլ ) ուսանողական միությունների հետ, նկատել տվեց Մայնի Ֆրակֆուրտի քաղաքապետը: Նա հիշատակեց 44 օրյա պատերազմը, Արցախի հայաթափումը, իսկ հեռուստաէկրանից «աղետալի» իրադարձությունների լուսաբանումը անհավատալի ցածրաձայն էր: Երբեմն հեռուստացույցն ուզում եմ դուրս շպրտել՝ միակողմանի, բեւեռացված լուսաբանումը զայրացնում է ինձ: Միջազգային հանրությունն էլ զարմանալի լուռ էր: Հպարտ եմ, որ դուք ցածրաձայն ու լուռ չեք, այլ՝ ուղի եք որոնում քաղաքական լանդշաֆթում լսելի դարձնելու ձեր ձայնը: Այն, ինչ հիմա Հայաստանի հետ է կատարվում, տեսանելի դարձնելն է ձեզ համար կարեւոր: Երբեմն ամաչում եմ, երբ քաղաքական որոշ գործիչներ, պետական պաշտոնյաներ կասկածի տակ են դնում Հայոց ցեղասպանությունը, սուրբ Պողոսի տաճարում իմ ելույթից հետո նամակներ են գրում, թե իբրեւ քաղաքապետ ինչպե՞ս կարող ես Հայոց ցեղասպանության մասին խոսել: Ուզում եմ ասել՝ ամեն օր եմ խոսելու՝ Հայոց ցեղասպանության մասին հստակ ու պարզ: Ես ձեր կողմից եմ, այս քաղաքի ուսանողությունը պիտի իմանա հայ ժողովրդի հետ կատարվածի, ցեղասպանության մասին»: Մայնի Ֆրակֆուրտի քաղաքապետ պարսկուհի Նարգեսս Էսքանդարի-Գրյունբերգը Գերմանիայում առաջին կին միգրանտն է, որ քաղաքապետի պաշտոն է ստացել:
Քաղաքապետի ողջույնի խոսքից հետո ներկաների զգայական աշխարհը սնուցեցին դուդուկահար Մանե Հարությունյանը եւ լուսանկարիչ Անահիտ Հայրապետյանը, որի «Արցախապատում» լուսապատկերների ցուցադրությունը հուզեց շատերին:
Միջոցառումն ավարտվեց բանավեճով: «Միասին»-ի վարչության ատենապետ Արամ Անտոնյանի եւ Բունդեսթագի պատգամավոր, Կանաչների կուսակցության անդամ Մաքս Լուքսի զրույցի թեման Գերմանիայում հայության խնդիրները լսելի եւ ընկալելի դարձնելն էր, Ադրբեջանի խավիարային դիվանագիտությունը, Հայաստանի ժողովրդավարացման գործընթացը: «Հայաստանը փոքրամասնություններին պաշտպանության հարցում համեմատաբար լավ օրինակ է », նկատել տվեց Մաքս Լուքսը: Բունդեսթագի պատգամավորը քննադատեց եվրոպական քաղաքական կառույցների՝ Ալիեւից կաշառառությունը, գազային պայմանագրով կախվածությունը: Ի տարբերություն Մայնի Ֆրանկֆուրտի քաղաքապետի, Բունդեսթագի մարդու իրավունքների հանձնախմբի անդամ Լուքսը հստակ նշեց ագրեսոր Ադրբեջանի անունը: «Լեռնային Ղարաբաղից էթնիկ հայերի բռնագաղթից հետո, Բաքվի անիրավ ռեժիմին նույնիսկ պարգեատրեցին: Շատ մեծ սխալ էր, որ մասամբ պայմանավորված էր նրանով, թե ում ենք լսում, ով է մեր գործակիցը: Վերջինը, իմ կարծիքով, պետք է լինի Հայաստանի ուժեղ քաղաքացիական հանրությունը, ոչ թե Հայաստանի կառավարությունը, որ մի շարք տեղերում միջնորդում էր, թե այնքան էլ վատ չի լինի, որ COP29-ը Բաքվում կայանա»: Լուքսի կարծիքով Հայաստանի ամրապնդումը հնարավոր է հիմնարար այնպիսի փոփոխությամբ, որ Հայաստանի պաշտոնական տեսակետը ներկայացնողները լինեն այն մարդիկ, որ իրենց ողջ ուժը ներդնում են ոչ թե սեփական բարօրության, այլ՝ իրենց ժողովրդի համար: «Պիտի այնպես անենք, որ ապագայում Հայաստանի հանդեպ ագրեսիան չկրկնվի», խոսքը եզրափակեց Լուքսը:
«Միասին»-ը պաշտպանում է գերմանայ ուսանողների շահերը, առաջնահերթ քաղաքական շահերը: 2020-ի պատերազմից հետո, Գերմանիայում «Գորշ գայլերին» դիմագրավելու համար գերմանահայ երիտասարդները վճռել են համախմբվել եւ պայքարել: «Միասին»-ը դրա վառ արտահայտությունն է: Նրա հիմնադիր անդամներն են Արամ Անտոնյանը, Աննա Ղազարյանը, Կարինա Գրիգորյանը, Արսեն Անտոնյանը, Կարինա Պետրոսյանը, Խորեն Գրիգորյանը, Սահակ Արտազյանը, Արփի եւ Սաթենիկ Գույումճյանները:
ԱՆԱՀԻՏ ՀՈՎՍԵՓՅԱՆ
Գերմանիա
