Հուլիսի 29-ին տեղի է ունեցել Իրանի Մեջլիսի ազգային անվտանգության եւ արտաքին քաղաքականության մշտական հանձնաժողովի նիստը, որն անդրադարձել է 12-օրյա պատերազմից հետո տարածաշրջանում ձեւավորված քաղաքական իրավիճակին:
Քննարկման ընթացքում շոշափվել է նաեւ Իրանի կողմից «կարմիր գիծ» հռչակված՝ Զանգեզուրի միջանցքի արտապատվիրակման հարցը:
Հանձնաժողովի անդամ Բորուջերդին նշել է, որ Զանգեզուրի վերաբերյալ Իրանի պաշտոնական դիրքորոշումը մի քանի անգամ փոխանցվել է ինչպես Վլադիմիր Պուտինին, այնպես էլ Ռեջեփ Թայիփ Էրդողանին: Նա ընդգծել է, որ այս փուլում Իրանի վերամոբիլիզացիան Զանգեզուրում ունի կարեւոր նշանակություն:
Իր ելույթում հանձնաժողովի խոսնակ Էբրահիմ Ռեզային շեշտել է Հայաստանի բացառիկ դերը՝ Իրանը կապելու Եվրոպական մայրցամաքի հետ: Նա անդրադարձել է նաեւ Բաքվի հավակնություններին «միջանցքի» նկատմամբ՝ ընդգծելով, որ Հայկական Սյունիքի կորուստը հակասում է Իրանի ազգային շահերին, քանի որ նման դեպքում Իրանը կարող է կորցնել իր հարեւաններից մեկին:
Խոսնակը հավելել է, որ Հայաստանի ներկայիս կառավարությունն ունակ չէ պաշտպանելու Սյունիքը, եւ վերահաստատել է Իրանի դիրքորոշումը, ըստ որի՝ Կովկասի խնդիրները պետք է լուծվեն տարածաշրջանի երկրների մասնակցությամբ, առանց արտաքին միջամտության:
Գ. ԱՌԱՔԵԼՅԱՆ
