«Ազգ»-ի հարցին, թե ընդդիմությունն ինչո՞ւ չի մասնակցում քննիչ հանձնաժողովի նիստերին, ընդդիմադիր պատգամավոր Տիգրան Աբրահամյանն արձագանքում է՝ շոուի մաս կազմել չեն ուզում:
«Ազգ»-ի հետ զրույցում նա ասում է` որպես կանոն քննիչ հանձնաժողովն ընդդիմության գործիքներից է, որովհետեւ իշխանությունն, առանց այն էլ տիրապետում է ամբողջ գործիքակազմին՝ քննչական մարմիններ, դատախազություն է, Ազգային անվտանգության ծառայություն, պաշտպանության նախարարություն եւ այլն: «Այսինքն` իշխանությունն անհրաժեշտ փաստեր հավաքագրելու խնդիր պարզապես չունի: Պատերազմին վերաբերող հանգամաքներին պետք է արձագանքեն իրավապահ համակարգը ներկայացնող մարմինները, ու եթե պատասխանելու կամ արձագանքելու խնդիր կա, դա պետք է լինի դատարաններում: Նիկոլ Փաշինյանը պետք է պատասխանի ոչ թե պատգամավորների, այլ քննիչների, դատավորների հարցերին: Անկախ հանգամանքից՝ Փաշինյանը քննիչ հանձնաժողովի նիստում ի՞նչ էր խոսում, ո՞ւմ էր մեղադրում, ինքն է անձամբ խոստովանում՝ ցանկացած իրավիճակի պատասխանատուն ինքն է», -ասում է մեր զրուցակիցը:
Ինչ վերաբերում է Ապրիլյան 4-օրյա ու 44-օրյա պատերազմի հանգամանքներն ուսումնասիրող քննիչ հանձնաժողովներին, ապա, ըստ ԱԺ «Պատիվ ունեմ» խմբակցության քարտուղարի` այս հարցում հստակ տարանջատում կա. 4-օրյա պատերազմի հանգամանքները քննել են ոչ այդ ժամանակի իշխանության եղած ուժի, այսինքն՝ Հանրապետակյանի կողմից. «Այն քննվել է Փաշինյանի իշխանության՝ «Քաղաքացիական պայմանագրի» կողմից: 44-օրյա պատերազմի հանգամանքները քննող հանձնաժողովի մեջ ներառված մեծամասնությունը Փաշինյանի թիմակիցներն են: Իսկ այդ իշխանությունն ինքն իր մասով ո՛չ կարող է քաղաքական օբյեկտիվ գնահատական տալ, ո՛չ էլ կարող է դրանք վերլուծել ու ներկայացնել հանրությանը: Եվ, բնական է, որ այս հանձնաժողովն իր գործունեությամբ խնդիր է դրել ոչ թե պարզել հանգամանքները, այլ քաղաքական իշխանության պատասխանատվության քողարկումն է ու իրավիճակը տարբեր դերակատարների վրա՝ զինվորականների, միջազգային գործընկերների կամ պաշտոնատար նախկին անձնանց վրա գցելը»:
Աբրահամյանն, անդրադառնալով ՀՀ Գլխավոր շտաբի նախկին պետ Օնիկ Գասպարյանի երկարաշունչ տեքստին, որտեղ բարձրաստիճան նախկին զինվորականն անդարդարձել էր վարչապետ Փաշինյանի՝ քննիչ հանձնաժողովում արած հայտարարություններին, նշում է. «Եթե Գասպարյանն այդ տեքստով պետք է խոսեր, ավելի լավ է՝ չխոսեր: Դա ոչ թե արձագանքի, այլ, ավելի շատ, սեփական անձն ապահովագրելու կամ արդարացման էր նման: Բայց ակնհայտ է մի բան՝ եթե Նիկոլ Փաշինյանը ինչ-որ պահից սկսած ցանկանա իրավական գործընթաց սկսել Գասպարյանի նկատմամբ, ապա ոչ մի արդարացում չի փրկելու նախկին զինվորականին»:
Պատգամավորի դիտարկմամբ՝ անհասկանալի է նաեւ ԳՇ նախկին պետի այն պնդումը, թե 2021-ի փետրվարի 25-ի հայտարարությունը, որում Գլխավոր շտաբն ու ավելի քան 30 բարձրաստիճան զինվորական պահանջում էին Նիկոլ Փաշինյանի հրաժարականը, արել է իր կամոք ու առանց որեւէ ուժի հետ համագործակության: «Ուսադիր ու զինվորական համազգետ կրող մարդը պետք է անի իր ասածը, տեր լինի հայտարարություններին»,- ամփոփում է մեր զրուցակիցը:
ՍԵՎԱԿ ՎԱՐԴՈՒՄՅԱՆ
