Հոկտեմբերի 17-ին, ժամը 15:00-ին, Խաչատուր Աբովյանի տուն-թանգարանում տեղի ունեցավ Խաչատուր Աբովյանի ծննդյան տարեդարձին նվիրված «Հոգեւորականը» խորագրով միջոցառում եւ երկու գրքի շնորհանդես: Ներկա էին Արծրուն Ավագյանը, Սամվել Մուրադյանը, Նարինե Դիլբարյանը եւ ուրիշներ:
Անդրադարձ եղավ Խաչատուր Աբովյանի հոգեւորական կերպարին ու գործունեությանը: Հոգեւոր կրթություն, աշխարհընկալում, գիտելիքներ Խաչատուր Աբովյանը առաջին անգամ ստացել է Ս. Էջմիածնում, եւ իր լուսավորչական գործունեության հիմքերը դրված են եղել հենց Ս. Էջմիածնում:
«Էջմիածինը չէ՞ր միթե, որ ես իմ կյանքում առաջին անգամ ճանաչեցի աշխարհը, որ չնայած էությամբ միապաղաղ, բայց լի էր բազմազան տեսարաններով, զգայություննորով, սրտակեղեք եւ հոգեպարար, սարսափելի եւ հաճելի իրադարձություններով, որ ես ապրել եմ ինը տարեկանից սկսած»,-ասել է Աբովյանը:
Միջոցառման ընթացքում հնչեցին ասմունքներ եւ կրոնադաստիարակչական բնույթի ասույթներ սաների կողմից: Հոգեւոր երգերով հանդես եկավ «Գեղարդ» երգեցիկ խումբը:
Տեղի ունեցավ «Խաչատուր Աբովյանի պատումի արվեստը» մենագրության շնորհանդեսը եւ հանդիպում գրքի հեղինակ Աստղիկ Սողոյանի հետ, որ փորձեց համառոտ ներկայացնել գիրքը:
Գիրքը կազմվել է Աստղիկ Սողոյանի ասպիրանտական ատենախոսության հիման վրա: Մենագրությունը նվիրված է Խաչատուր Աբովյանի ստեղծագործության կառույցի ուսումնասիրությանը՝ պատումին: Քննվել են Աբովյանի երկերը: Գիրքը նախատեսված է գրականագետների, գրականության տեսաբանների, բանասերների եւ գրականությամբ հետաքրքրվող լայն շրջանակի ընթերցողների համար:
«Աբովյանական տեքստերի աշխարհը այսօրվա ընթերցողի համար ընկալելը բարդ է, անհրաժեշտ են նոր վերլուծություններ, որոնք հետաքրքրություն կառաջացնեն ընթերցողների շրջանակներում, իսկ մենագրությունը այդպիսի փորձ է նոր աբովյանական ընթերցողներ ստեղծելու համար»,- ասաց Աստղիկ Սողոյանը:
Լույս է տեսել նաեւ «Լուսավորչի դասեր» գիրքը, որի հեղինակն ու կազմողը՝ Արեւիկ Ստամբոլցյանը, նույնպես ներկա էր: Գրքում ներկայացված են Խաչատուր Աբովյանի գրական ժառանգության մեջ տեղ գտած լավագույն մտքերը: Դրանք դասակարգված են ըստ կենսական ոլորտների եւ իմաստային նշանակության:
ՆԱՐԵ ԽԱՆԱՂՅԱՆ
ՀՊՄՀ Լրագրության 2-րդ կուրսի ուսանողուհի
