«Ազգ»ի խմբագրություն, 3 մայիս, 2019
Նախանցյալ շաբաթ մեր թերթի առաջին էջում ներկայացրել էինք հակիրճ տեղեկություն ՀՀ Վճռաբեկ դատարանի կողմից Սեւակ Հաճի Հակոբյանի նկատմամբ արձակված վճռի մասին, որով «բողոքարկման ենթակա չէ» եզրակացությամբ մերժվում էր «Ազգ» թերթի ու նրա խմբագրի դեմ նույն անձի ներկայացրած բողոքը: Փաստորեն այդ վճիռը վերահաստատում էր նախորդՙ ՀՀ Առաջին եւ Վերաքննիչ դատարանների արձակած վճիռը:
Արդ, Եվրոպական դատական ատյաններում ՀՀ դատարանների վճիռը բողոքարկելու փոխարեն, Սեւակ Հաճի Հակոբյանը, նոր ապացույցներ տալով իր մասին «Ազգ»ի խմբագրի տված բնորոշմանըՙ «վավերական խարդախ», անցել է բացարձակ խուլիգանությանՙ զանգահարում եւ սեռական բնույթի հայհոյանքներով փորձում է ահաբեկել մարդկանց եւ սպառնալ: Ավելինՙ օրերս փորձել է Բեյրութում խափանել մեր քույր հրատարակությանՙ «Պայքար» շաբաթաթերթի տպագրումն ու տարածումը, կռահելով նույն տեղեկության հրապարակումը այնտեղ:
Մեզ մնում է «Ազգ»ի կայքէջով եւս մեկ անգամ տարածել մեր տպածը եւ ընթերցողներից խնդրել օգնել մեզ տարածման գործում:
Սեւակ Հաճի Հակոբյանին չհաջողվեց պարտակել իր խարդախ լինելը
Հայաստանի Հանրապետության Վճռաբեկ դատարանը 2019 թ. ապրիլի 22-ին դատական կազմի անդամների (նախագահողՙ Ռ. Հակոբյան) միաձայնությամբ ընդունած N ԴԴ6-Ե-3294 վճռով փաստորեն վերջ դրեց իր խարդախություններով լիբանանահայությանը հայտնի Սեւակ Հաճի Հակոբյանի ինքնարդարացման տվայտանքներին:
Փաստորեն ՀՀ Վճռաբեկ դատարանը երրորդ եւ բարձրագույն ատյանն էր մեր դատական համակարգի, որը մերժեց ընդունել Սեւակ Հաճի Հակոբյանի դատական հայցը ընդդեմ «Ազգ» օրաթերթի եւ նրա խմբագիր Հակոբ Ավետիքյանի: Նախապես նման որոշում կայացրել էին Երեւանի ընդհանուր իրավասության դատարանը (դատավոր Գ. Մազմանյան) եւ ՀՀ Վերաքննիչ քաղաքացիական դատարանը (դատավորներՙ Կ. Չիլինգարյան, Ա. Մկրտչյան, Մ. Հարթենյան):
Սեւակ Հաճի Հակոբյանի դատական հայցերի առիթը «Ազգ» թերթում Հ. Ավետիքյանի ստորագրած հոդվածն էր, որտեղ հոդվածագիրը հայոց լեզվի դեմ նրա մեղանչումները քննադատելուց զատ անդրադարձել էր նրա բարոյական կերպարին եւ նրան բնութագրել որպես «վավերական խարդախ», նկատի ունենալով նրա ֆինանսական խարդախությունները, չեկերի կեղծումները եւլն, որոնք լիբանանյան տարբեր դատարաններում նախապես քննվել եւ հաստատվել էին ու նրան տարբեր ժամկետներով բանտարգելության էին առաջնորդել:
Ամենահատկանշականն այն էր, որ Սեւակ Հաճի Հակոբյանը հայաստանյան դատարաններին ներկայացրած իր հայցերում պահանջել էր պարտավորեցնել «Ազգ» թերթին ու նրա խմբագրին հերքել «վավերական խարդախ» որակումը, ներողություն խնդրել իրենից եւ որպես փոխհատուցում վճարել, ոչ ավել ու ոչ պակաս, ընդհանուր շուրջ 435000 դոլարին համարժեք դրամ:
Իր որոշման ավարտին ՀՀ Վճռաբեկ դատարանը ընդգծում է, որ վճիռը «օրինական ուժի մեջ է մտնում կայացման պահից, վերջնական է եւ ենթակա չէ բողոքարկման»:
Չիմացողներին տեղեկացնենք, որ Սեւակ Հաճի Հակոբյանը խմբագիրն է ՌԱԿ Լիբանանի պաշտոնաթերթ «Զարթօնք» օրաթերթի, ատենապետը ՌԱԿ Լիբանանի Շրջանային վարչության, ատենադպիրը ՌԱԿ անօրինական «կենտրոնական վարչության» եւ, ըստ որոշ տվյալների, պատրաստվում է շուտով գլխավորել այդ անօրինական վարչությունը:
Վավերական խարդախին հորդորում ենք որոնել արդարադատական նոր ատյաններ:
