Հայկական ուսումնասիրությունների եւ հետազոտությունների ազգային ասոցիացիայցի (NAASR), Հայոց պատմության Տարաքչյան-Ջաֆարյան ամբիոնի եւ Թաֆթս համալսարանի հայկական ակումբի հովանավորությամբ հոկտեմբերի 4-ին Թաֆթսի շրջանավարտների հանդիպման դահլիճում պրոֆ. Քրիստինա Մարանջին ներկայացրել է իր վերջերս հրատարակված գիրքը «Հայաստանի արվեստը: Ներածություն» խորագրով (The Art of Armenia: An Introduction. Oxford University Press), որտեղ մանրազնին քննության է առել Հայաստանում արվեստների (ճարտարապետություն, քանդակագործություն, մետաղագործություն, փայտափորագրություն, կերամիկական արվեստ, ձեռագրերի նկարազարդում, եւայլն) զարգացումը սկսած անտիկ աշխարհից մինչեւ ներկա ժամանակները:
Մարանջին Թաֆթս համալսարանի (Մեդֆորդ, Մասսաչուսեթս) Արվեստի եւ արվեստի պատմության բաժնի ամբիոնի վարիչն է: Նախկինում հրատարակել է երեք մենագրություններ: Հեղինակ է ավելի քան 70 էսսեների եւ հոդվածների, ինչպես նաեւ «Հայաստանի Միջնադարյան ճարտարապետությունը» (2001) եւ «Զգոն ուժեր… վաղ միջնադարյան Հայաստանի երեք եկեղեցիները» (2015) հատորները: Այս վերջինիս համար արժանացել է NAASR-ի դոկտ. Սոնա Արոնյանի անվան գրական մրցանակին:
Նոր գրքի ներկայացումը տեղի է ունենում Թաֆթսում Չարլզ Կարապետյանի անվան դասախոսությունների տարեկան շարքի շրջանակներում:
