1985-ին աշխարհում տեղի ունեցավ երկու իրադարձություն, որոնք, ինչպես ասում են, «հիմնավորապես փոխեցին մարդկանց կյանքը»: Նախ, ՍՄԿԿ Կենտրոնական կոմիտեի գլխավոր քարտուղար ընտրվեց Միխաիլ Սերգեյի Գորբաչովը, դա այդ տարվա մարտի 11-ին էր, իսկ ավելի ուշ, բայց նույն տարում, Կոտայքի մարզի (այն ժամանակ մարզ չէր) Նոր գեղի գյուղի գյուղապետ ընտրվեց Ֆրոնտիկ Թեւոսյանը: Եթե հետաքրքրական է, ապա ասեմ, որ նույն 1985-ին Իսրայելը սկսեց հանել իր զորքը Լիբանանից, իսկ Մայք Թայսոնը սկսեց իր պրոֆեսիոնալ կարիերան բռնցքամարտում: Առհասարակ այդ տարին հագեցած էր հետաքրքրական իրադարձություններով, բայց «աշխարհացունցը» Գորբաչովն էր եւ Թեւոսյանը:
Առաջինն, ինչպես գիտեք, սկսեց իր նոր քաղաքականությունը, հանրահայտ` «պերեստրոյկան», երկրորդն էլ սկսեց օգտվել դրանից: Արդյունքում սովետական երկիրը փլուզվեց, բոլոր ղեկավարները փոխվեցին, բայց Ֆրոնտիկ Թեւոսյանը մնաց եւ ահա արդեն 30 տարուց ավել է, ինչ Նոր գեղիի գյուղապետն է:
Ինչ կապ ունի նա Գորբաչովի հե՞տ, ոչ մի, եթե իհարկե մոռանանք, որ երկուսն էլ նույն` սովետական երկրում են ծնվել, Գորբաչովն անգամ իշխել է, Թեւոսյանը` միայն Նոր Գեղիում: Իրականում Թեւոսյանն եւ Գորբաչովը շատ տարբեր մարդիկ են, բայց նրանց միավորում է մի զիլ բան. երկուսն էլ անուրանալի ավանդ ունեն մարդկության պատմության մեջ, ու եթե Գորբաչովի պարագան պարզ է, ապա եկեք խոսենք պարոն Ֆրոնտիկ Թեւոսյանի մասին:
Հիմա պարոն Ֆրոնտիկը անհամբեր սպասում է մի բանի, թե ե՞րբ պետք է նախագահը, նկատի ունեմ` հանրապետության, մեդալ տա իրեն: Հիշում է, որ իր ծննդյան 70-ամյակին, այն ժամանակ վարչապետ Անդրանիկ Մարգարյանն իրեն հուշամեդալ է տվել, Ազգային ժողովից էլ մեդալ ունի, բայց այ նախագահից չունի, հիմա սպասում է, շատ անհամբեր: Բայց ավելի ուշագրավ բան տեղի է ունեցել պարոն Ֆրոնտիկ Թեւոսյանի 65-ամյակին: Այդ օրը Նոր Գեղիի միակ երաժշտական դպրոցը կոչվել է Ֆրոնտիկ Թեւոսյանի անվան Նոր Գեղիի երաժշտական դպրոց: Ի դեպ, ինքը պարոն Ֆրոնտիկը երաժշտական որեւէ գործիքի չի տիրապետում: Դե իսկ արդեն 75 ամյակին, այսինքն բոլորովին վերջերս, Նոր Գեղիում լուրջ խնդրի առջեւ են կանգնած եղել: Բանն այն է, որ, ինչպես պատմում է պարոն Ֆրոնտիկն ինքը, գյուղի ավագանին, բացառապես գյուղի ավագանին եւ բացառապես ինքնուրույնաբար, որոշել է իրենց սիրելի գյուղապետի անունը տալ գյուղի որեւէ նվիրական բանի: Սկզբում կանգ են առել գյուղի մշակույթի պալատի վրա: Հետո չգիտեմ որտեղից հայտնել են, որ մշակույթի պալատը չի կարելի անվանել կենդանի մարդու անունով, եւ ավագանին որոշել է գյուղի… եկեղեցին կոչել սիրելի գյուղապետի անունով: Հա ի՞նչ, Ֆրոնտիկ Թեւոսյանի անվան Նոր Գեղիի սուրբ եկեղեցի, կամ պարզապես` Սուրբ Ֆրոնտիկ: Բայց դե, ինչպես պարոն Ֆրոնտիկն է ներկայացնում, եկեղեցին էլ չի ստացվել, ստիպված, կրկնում եմ` ստիպված, մարդիկ որոշել են, որ լավ, բերեք գյուղի կենտրոնական փողոցը վերանվանենք Ֆրոնտիկ Թեւոսյանի անվան փողոց: Միաձայն, ես կասեի անգամ` հոտընկայս որոշել են, որ վերանվանում են, ապա իրենց այդ որոշումը ներկայացրել են պարոն սիրելի գյուղապետին, պարոն սիրելին էլ, ինչպես ինքն է ասում` «դե առաջարկեցին, հո չէի՞ մերժելու»: Ու չի մերժել: Եվ այսպես Նոր Գեղիի կենտրոնական, նախկինում Երեւանյան փողոցը դարձել է Ֆրոնտիկ Թեւոսյանի անվան: Իբր Երեւանյանն ի՞նչ անուն է որ… Ե՛ս չեմ ասում, պարոն Ֆրոնտի՛կն է ասում:
Պարոն Թեւոսյանն ասում է նաեւ, որ մարդու համար նման բաները հաճելի են: Ավելին, չնայած ինքը` «բանկերում համարյա մեկ միլիոն դոլար վարկեր ունի» եւ «չորս հատ տղա», բայց իր քաղաքական կարիերան սկսել է ճիշտ այն ժամանակ, երբ Մայք Թայսոնն է սկսել իր բռնցքամարտիկի կարիերան, Գորբաչովն էլ սկսել է իր «պերեստրոյկան» եւ հիմա այս երեքից միայն ինքն է մնացել իր տեղում, ուրեմն պարոն Ֆրոնտիկի կյանքում ամեն ինչ հաճելի է: Միայն եթե նախագահն էլ մեդալը տա եւ համարյա մեկ միլիոն վարկն էլ մարի, այլեւս վերջ: Չնայած 30 տարուց ավել մի գյուղ է ղեկավարում, ի՞նչ վերջ, հո Գորբաչովը չի՞…
Իմիջիայլոց, Ֆրոնտիկ Թեւոսյանը կոչ է անում գնալ Նոր Գեղի եւ բնակիչներից հարցնել, թե ինչ կարծիքի են, որ գյուղի երաժշտական դպրոցն ու կենտրոնական փողոցը կրում են սիրելի պարոն գյուղապետի անունը: Ինքն իր կողմից միայն ասում է, որ ինչքան կարողացել է` օգնել է ժողովրդին, իր հնարավորությունների սահմաններում, դեռ մի բան էլ ավել: Այ հենց այդ պատճառով էլ, ինչպես նշել է պարոն Ֆրոնտիկը, ինքը ընկել է համարյա մեկ միլիոն դոլար վարկերի մեջ, ժողովրդին է օգնել, համարյա մեկ միլիոն դոլարի չափ է կարողացել, այդքան է օգնել, ավելին կարողանար, ավելի կօգներ: Հիմա էլ ժողովուրդը հավանաբար պետք է օգնի գյուղապետին, որ իրենց պատճառով կուտակած համարյա մեկ միլիոն վարկերը մարի:
Բայց, այնուամենայնիվ, ժամանակն է վերանայել մշակույթի պալատներն եւ եկղեցիները կենդանի մարդկանց անունով չանվանելու պրակտիկան: Չմոռանամ ասել, որ անցյալ տարվա` 2016-ի հունվարի 20-ին, Կալիֆորնիայի տեխնոլոգիական ինստիտուտի աշխատակիցներ Մայքլ Բրաունն եւ Կոնստանտին Բատիգինը հայտարարեցին, որ արեգնակային համակարգում նոր մոլորակ է հայտրաբերվել: Բայց սա իմիջիայլոց, եթե ձեզ հետաքրքրում է նորը, նորությունը եւ զարգացումը:
